Ленскэй оройуонугар СӨ Бырабыыталыстыбатын отчуота түмүктэннэ

Олунньу 13-14 күннэригэр Ленскэй оройуонун бары нэһилиэнньэлээх пууннарыгар СӨ Бырабыыталыстыбатын Бэрэссэдээтэлин солбуйааччы Ольга Балабкина салайааччылаах ситэриилээх былаас уорганнарын отчуоттара ыытылыннылар. Түмүк тэрээһин Ленскэй куоракка буолан ааста.

Ольга Балабкина 2024 сыллааҕы Саха сирин социальнай-экэнэмичэскэй сайдыытын ситиһиилэрин туһунан кэпсээтэ. Ленскэй оройуонугар ситиһиилээх түмүктэригэр болҕомтотун уурда.
2024 сыл түмүгүнэн «Олохтоох каадыры бырамыысыланнаска» бырайыак чэрчитинэн Ленскэй оройуонун 454 олохтооҕо, онтон 220 киһи — 35 саастарыгар диэри ыччат, 49-һа – тыа сирин олохтооҕо.

«Газпром» ПАУо 2021-2025 сылларга СӨ гаастааһынын бырагырааматынан «Сила Сибири» гаас ситимин устата Ленскэй, Өлүөхүмэ, Алдан, Нерюнгри оройуоннарыгар, ол иһигэр Бэчинчэ, Батамай уонна Мурья сэлиэнньэлэригэр гааһынан хааччыйыы үлэлэрэ барыахтара. Ленскэйгэ кииннэммит ититэр ситимтэн 562 олорор дьиэ гаас оттукка көһөрүллүбүт. Ити сыалга СӨ бүддьүөтүттэн 82 мөл. солк. көрүллүбүт. Хас биирдии ыалынан 150 тыһыынча солкуобай субсидия тиксэриллибит.

Былырыын Ленскэйгэ аныгылыы оҥоһуулаах оҕо оонньуур былаһаакката тутуллубут уонна Орджоникидзе аатынан уулусса саҥардыллыбыт. Арассыыйа Бэрэсидьиэнэ Владимир Путин көҕүлээһининэн «Олорор дьиэ уонна куорат эйгэтэ» национальнай бырайыак чэрчитинэн Ленскэй куорат бырайыага Уһук Илин федеральнай уокурук субъектарыгар табыгастаах, тупсаҕай көстүүлээх бырайыактары олоххо киллэриигэ Бүтүн Арассыыйатааҕы куонкуруска кыайбыт. Былырыын сэтинньигэ оройуон киинигэр тырааныспары гааска көһөрөр саҥа пуун аһыллыбыт.

Оройуоҥҥа үүнэр көлүөнэҕэ патриотическай иитиигэ улахан болҕомто ууруллар. 2024 сыл ахсынньытыгар Ленскэй оройуонугар Юнармия сэттис дьиэтэ аһыллыбыт. Оройуон 11 оскуолаларыгар байыаннай- патриотическай кулууптар үлэлииллэр, бары үөрэх тэрилтэлэригэр «Орлята России» алын кылаас үөрэнээччилэрин социализациялыырга федеральнай бырайыак олоххо киллэриллибит, «Движения первых» бастакы сүһүөх отделениелара тэриллибиттэр. «Оҕо саас навигатордара» бырайыак 16 оскуолаҕа киллэриллибит.

Нэһилиэнньэ туруорсар боппуруостара сыыйа быһаарыллаллар диэн Ольга Балабкина бэлиэтээтэ. Ол курдук, былырыын отчуот кэмигэр идэлээх быраастар көһө сылдьар биригээдэлэрин тэрийэр туһунан этии киирбит. 2024 сыл тохсунньутугар, атырдьах ыйыгар уонна алтынньыга Ленскэйгэ, Пеледуйга уонна Витимҥэ Дьокуускайдааҕы офтальмохирургическай мэдиссиинэ биригээдэтэ үлэлээбит. Эпэрээссийэлэр, чинчийиилэр ыытыллыбыттар, ыарыһахтар сорҕолоро Дьокуускайга эмтэниигэ ыытыллыбыттар.

Атырдьах ыйыгар Өрөспүүбүлүкэтээҕи уопсастыбаннай доруобуйа уонна мэдиссиинэ профилактикатын киинин исписэлиистэрэ Ленскэй, Турукта, Витим, Пеледуй, Толоон, уо.д.а. нэһилиэктэринэн үлэлээбиттэр. Кулун тутарга Ленскэйгэ Өрөспүүбүлүкэтээҕи психоневрологическай диспансер быраастара кэлэ сылдьыбыттар. Маны таһынан, сылга 2-3 төгүл Ленскэйдээҕи киин балыыһа быраастара бөһүөлэктэринэн сылдьыбыттар.

Саха сирин бары муниципальнай оройуоннарын уонна куораттааҕы уокуруктарын нэһилиэнньэлээх пууннарыгар ситэриилээх былаас уорганнарын отчуота кулун тутар 6 күнүгэр диэри салҕанан барыаҕа. Бу көрсүһүүлэргэ олохтоохтор долгутар ыйытыктарын бириэхтэрин уонна сиһилии хоруйдары ылыахтарын сөп. Отчуот түмүгэ «Саха» НКИХ телеханаалларыгар уонна араадьыйаҕа тахсыаҕа.