Ленскэй суута оҕо былаһааккаҕа эчэйиини ылбытынан салайар хампаанньаттан толуйууну төлүүргэ уураахтаата

СӨ Ленскэй оройуоннааҕы суута оройуоннааҕы борокуруор оҕо интэриэһин көмүскээн салайар хампаанньаны утары тэриллибит гражданскай дьыаланы көрдө диэн СӨ Сууттарын холбоһуктаах пресс-сулууспалара иһитиннэрэр.

Бу тэрилтэ дириэктэрин Ленскэй оройуонун суута РФ Холуобунай кодексын 238 ыстатыйатын 2 чааһыгар «с» пуунунан урут буруйдаах диэн быһаарбыта, моральнай уонна  материальнай хоромньуну төлөөһүн уонна төлөбүрү ирдиир эбэһээтэлистибэлэри таһаарбыта.

Ленскэй куоракка 2024 сыл сайыныгар оҕо былаһааккатыгар быһылаан тахсыбыта. Ол киэһэ дьиэ тиэргэнигэр биир кыыс оҕо  оонньуу сылдьан, тимир хачыалтан охтубут. Кыыс охторугар хачыала төбөтүн саайбыт, ол түмүгэр улахан эт-хаан эчэйиитин ылбыт.

Суут уорганыгар үҥсүү суруйар кэмнэригэр, эмсэҕэлээбит оҕо дьарҕарбыт вегетативнай туруктаах диэн диагноз туруоруллубут.

Үҥсээччи 30 мөлүйүөн солкуобай суумалаах моральнай хоромньуну, ону тэҥэ суһал көмөҕө уонна кэлин былааннаммыт эмтээһиҥҥэ сыһыаннаах ороскуоттарга ирдэбил түһэрбит.

Сууттанааччы ирдэбили ылымматах, салалта хампаанньа дьаһалтата быһылаан тахсыбытыгар туох даҕаны быһаччы сибээс, ону тэҥэ управляющай хампаанньа оонньуур былаһаакканы көрүүнү-истиини, тупсарыыны ылымматаҕын бэлиэтээбит. Ирдэбил ылыныллыбатаҕын үрдүнэн, суут эт-хаан уонна өй-санаа эмсэҕэлээбитинэн, сиэр-майгы өттүнэн хоромньу оҥоһуллубут чахчытынан, ону тэҥэ управляющай хампаанньа буруйун кээмэйин учуоттаан сыаналаата.

Суут ирдэбили сорҕотун бигэргэттэ уонна 3 мөлүйүөн солкуобай моральнай хоромньуну, ону таһынан 354147,24 солкуобай материальнай хоромньуну төлүүргэ уурда.

Суут быһаарыыта өссө да сокуоннай күүһүгэр киирэ илик уонна СӨ Үрдүкү Суутугар ааһыныан сөп.