Ленскэйдээҕи полиция хапытаанын биэс сылга көҥүлүн быстылар

ИДьМ үлэһитин күнүн бырааһынньыгар Ленскэйдээҕи полиция хапытаана начаалынньыгын куомаҕа диэри кырбаабытын иһин суут бириигэбэрэ таҕыста. Урукку быраабы көмүскээччи үлэһитин биэс аҥаар сылга уопсай эрэһиимнээх холуонньаҕа хаайарга уураахтаатылар.

Санатан эттэххэ, иирсээн 2013 сыл сэтинньитигэр Ленскэй куорат биир эрэстэрээнигэр буолбута. Итирик туруктаах полиция хапытаана начаалынньыгын «хара» санааттан төбөтүгэр охсубут, онтон сылтаан эмсэҕэлээччи балыыһаҕа куомаҕа киирбит. Буруйданааччы буруйун билинэр уонна соруйан киһи доруобуйатыгар буортуну оҥорботоҕун этэр. Эмсэҕэлээччи кэргэнэ кэпсииринэн, эр киһи куоматтан тахсан, билигин Москваҕа реабилитацияны ааһар. Бириигэбэр күүһүгэр киирэ илик диэн ИДЬМ пресс-сулууспата суруйар.