Ленскэйгэ 21-23 км суол учаастагар ЫБМ эрэсиимэ үлэҕэ киирдэ

Ленскэй оройуонугар саахал түмүгэр ньиэп тохтубутунан «Мухтуйа» суол учаастагар миэстэтигэр ыксаллаах-быһыы майгы эрэсиимэ биллэрилиннэ диэн Экология министиэристибэтэ иһитиннэрэр.

Санаттахха, бу сыл кулун тутар 17 күнүгэр Ленскэй — Мииринэй трассатыгар икки таһаҕас тиэйэр массыыналар харсыспыттара. Саахал түмүгэр биир тырааныспар тэстибит цистернатыттан ньиэп суолга тохтубут уонна буорга тарҕаммыт.

Киртийии иэнэ 330 кв.м. буолбут. Уу эбийиэктэрин киртиийиитэ кутталы суоһаабат — Нүүйэ уонна аата суох үрэхтэр саахал тахсыбыт сириттэн ыраах сыталлар. Ылыллыбыт буор боруобаларын Экология лабораториятыгар эспэртииһэҕэ ыытыахтара.

«Ыксаллаах быһыы-майгы уонна баһаарынай куттал суох буолуутун хамыыһыйатын быһаарыытынан Ленскэй оройуонун 21-23 км суол учаастагар ыксаллаах быһыы-майгы эрэсиимэ үлэҕэ киирдэ», — диэн Саха сирин Экология министиэристибэтигэр иһитиннэрдилэр.