Ленскэйгэ быраастарга уонна учууталларга анаммыт дьиэ тутуута саҕаланна

Ленскэйгэ социальнай эйгэ исписэлиистэригэр аналлаах элбэх кыбартыыралаах дьиэ тутуута саҕаланна.

Эбийиэги 2026 сыл төрдүс кыбаарталыгар үлэҕэ киллэрэллэрэ былааннанар. Бу туһунан Ленскэй улууһун дьаһалтата иһитиннэрдэ.

Түөрт мэндиэмэннээх дьиэ 40-тан 50 кв. миэтирэҕэ диэри иэннээх биир, икки уонна үс хостоох 37 кыбартыыралаах. Дьиэ каадыр боппуруоһун быһаарыыга улахан хардыынан буолуоҕа диэн Ленскэй улуус баһылыгын солбуйааччыта Александр Юринок бэлиэтээтэ.

«Бырайыак атын эрэгийиэннэртэн үрдүк квалификациялаах быраастары, учууталлары уонна атын исписэлиистэри тардар кыаҕы биэриэҕэ, ол биһиги улууспутугар олох таһымын үрдэтиэҕэ», — диэтэ кини. Үлэ бэдэрээччитинэн «Полярная звезда» хампаанньа буолар.

2025 сылга дьиэ эркинин ууруу, тас ситимнэрин тардыы уонна түннүгүн туруоруу былааннанар. Дьиэ фасаадын үлэтэ уонна ититии ситимин үлэлэтии 2026 сылга былааннанна.