Ленскэйгэ электросамокат уоруйаҕа тутулунна

Ленскэй улууһун полиция дьуһуурунай чааһыгар олохтоох дьахтар оҕотуттан 80 тыһыынча солкуобай суумалаах электросамокат уорбуттарын туһунан тыллаабыт.  Бу туһунан ИДьМ пресс-сулууспата суруйар.

Холуобунай ирдэбил үлэһиттэрэ суһал-көрдүүр дьаһалларынан уорбаланааччыны туттулар. Хара санаалаах урут сууттана сылдьыбыт 29 саастаах эр киһи буолара быһаарыллыбыт.

Уол оҕо тиэргэнигэр оонньообут уонна оҕо былаһааккатыгар электросамокаты көрүүтэ-истиитэ суох хаалларбыт. Уорбаланааччы электросамокат  мэнээх сытарын көрөн илдьэ барарга быһаарыммыт. Уоруллубут малы атыылаары былааннаабыт да сатамматах. Электросамокаты хаһаайыныгар төнүннэрдилэр. Холуобунай дьыала тэрилиннэ. Буруйданааччы 5 сылга диэри көҥүлэ быһыллыан сөп.