Ленскэйгэ кабааны бултаабыт эр киһини буллулар
Бу күннэргэ социальнай ситимнэргэ Саха сиригэр дьиикэй кабааны бултаабыт эр киһи хаартыската тарҕаммыта. Экология министиэристибэтэ тустаах бэрэбиэркэни ыытан, булчут эр киһини буллулар диэн СӨ ИДьМ иһитиннэрэр.
Ленскэй оройуонун полицията социальнай ситимҥэ тарҕаммыт киһини быһаарда. Бу — 48 саастаах олохтоох киһи.
Барыллаан дааннайдарынан, кини Толоон сэлиэнньэтин чугаһыгар регистрациялаах саатынан кабааны ыппыт. Сааны уонна кабаан тириитин полициялар ыллылар. Эр киһи этэринэн, кабаан тириитинэн кини чуучала оҥорор былааннаах эбит.
Быһаарыллыбытынан, булчут хаартыскатын оҕолоро интэриниэккэ таһаарбыттар. Быһылаан тула бэрэбиэркэ ыытыллар.
Экология министиэристибэтэ эрдэ иһитиннэрбитинэн, кабааны тустаах көҥүлэ суох бултаатахха, 500-4000 солк. ыстарааптаныахха, ону кытта булт сэбин былдьатыахха уонна 90 000-210 000 солк. хоромньуну толуйуохха сөп.
Сообщить об опечатке
Текст, который будет отправлен нашим редакторам: