Ленскэйгэ мааркаламматах арыгы атыылааһынын чахчыта арылынна

Ленскэй оройуонун борокуратуурата олохтоох эр киһиэхэ судаарыстыбаннай буруйдааһынын өйөөтө. Кини РФ Холуобунай Кодексатын 171.1 ыст. 6 чааһын «б» пуунунан буруйданар.

Суут быһаарбытынан, урбаанньыт эр киһи «Хаски Легенда Севера», «Доброе Застолье Классическая», «Столичная водка», «Водка Талка» диэн ааттаах уонна да атын мааркаламматах арыгыны, 17,3 тыһ. бытыылканы, 4,6 мөл. солк. тахса суумаҕа атыыласпыт уонна Ленскэй куорат биир маҕаһыыныгар уура сытан атыылаабыт.

Суут эр киһини 1 сыл болдьохтоох усулуобунайдык көҥүлүн быһарга бириигэбэрдээтэ. Арыгы бородууксуйата былдьанна уонна бириигэбэр сокуоннай күүһүгэр киирбитин кэннэ суох оҥоруллуоҕа. Бу туһунан СӨ Борокуратууратын пресс-сулууспата иһитиннэрэр.