Ленскэйгэ оһоҕунан оттуллар дьиэ умайда, Уус Маайаҕа оҕо массыынаҕа киирэн биэрдэ

Дьуһуурунай борокуруор иһитиннэрбитинэн, ааспыт суукка устата эрэгийиэҥҥэ буруйу оҥоруу биэс түгэнэ бэлиэтэммит.

Бу дьыалаларынан бэрэбиэркэлэр ыытыллаллар уонна борокуратуура хонтуруолугар киирдэ.

Түөкүттэр араас албастарыгар дьону киллэрэ сатыыллара аҕыйаабат. Ол курдук, аны «ФСБ, ОЭБ ПК, инвестиция» диэн араас албаһы туттан төлөпүөннүүллэр. Оннук Дьокуускай куорат, Хаҥалас, Ленскэй, Мииринэй улуустарын олохтоохторун албыннааннар, 6  мөл.солк. кэриҥэ харчыларын «көтүтэн» ылбыттар.

Ленскэй улууһугар оһоҕунан оттулар кэтэх дьиэ умайан, дьиэ хаһаайына уокка былдьаммыт. Ону таһынан, тутуу былаһааккатыгар 1963  с.т. эр киһи үлэлии сылдьан бетон билиитэҕэ баттаппыт.

Өрөспүүбүлүкэ киин куоратыгар эр киһи гарааһыгар бэйэтин массыынатын гааһыттан сүһүрбүт (угаардаабыт).

Уус Маайа улууһугар 1982 с.т. эр киһи 2013  с.т. оҕону массыынанан түҥнэри көппүт, оҕо суол бэлиэтэ суох сиринэн туораан испит. Ол түмүгэр, оҕо балыыһаҕа киирбит.

Киһи өлүүлээх суол-тырааныспар быһылаана бэлиэтэммэтэх.

Арыгы иһэн баран массыына ыыппыт аҕыс киһи тутуллубут.