Ленскэйгэ сааны уорбуттар

ИДьМ Ленскэй оройуонунааҕы полиция салаатын дьуһуурунай чааһыгар бултуур саа уоруллубутун туһунан үҥсүү киирбит. Биллибэт киһи гарааһы алдьатан киирэн, сааны уорбут. Суһал, ирдиир тэрээһиннэр түмүктэринэн, уорбаланааччыны, эрдэ сууттана сылдьыбыт 46 саастаах эр киһини туппуттар.

Быһаарыллыбытынан, эр киһи түүн даача тиэргэнигэр киирбит, гараас аанын ыаҕас күлүүһүн алдьаппыт  уонна сиэйпэттэн  сааны уорарга санаммыт. Сиэйпэни монтировканан аһан баран  12 калибрдаах сааны, саа икки маҕаһыынын ылбыт. Уоруллубут саатын 30 тыһ. солкуобайга атыылаабыт. Харчытынан массыынатыгар саппаас чаас атыыласпыт.

Сааны атыыласпыт киһи саатын тыаҕа кистээбитин, полиция үлэһиттэрэ онтон булбуттар. Бары уоруллубут маллар эспэртиисэҕэ ыытыллыбыттар.

РФ Холуобунай кодексатын 226 ыст. 1 ч. «Сааны күһэйэн уоруу, эстэр, бойобуой саппааһы уоруу» иһин, ону сэргэ Холуобунай кодекс 158 ыст. «Уоруу», 222 ыст. » Сокуону кэһэн туран сааны кистээһин, атыылааһын, тиэйии, тиэрдии» диэнинэн холуобунай дьыалалар тэрилиннилэр. Маны таһынан сааны атыыласпыт киһи эмиэ административнай эппиэтинэскэ тардыллар буолбут. Силиэстийэ салҕанар диэн СӨ ИДьМ пресс-сулууспата иһитиннэрэр.