Ленскэйгэ саҥа ТЭС тутуллуоҕа

Бэс ыйын 22 күнүгэр СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников  «Интер РАО» ПАУо  бэрэстэбииттэллэрин кытта көрүстэ. Бу хампаанньа Ленскэй улууһугар саҥа   электростанцияны тутуоҕа.

Саха сиригэр “Интер РАО – Управление электрогенерацией» ХЭТ генеральнай дириэктэрин солбуйааччыта Иван Смирнов, хампаанньа туттах үлэһиттэрэ Илья Фитисов уонна Денис Покровскай кэллилэр. Денис Покровскай Новоленскай ТЭС бырайыагын олоххо киллэрэр сыаллаах саҥа олохтоммут  хампаанньа салайааччытынан анаммыт.

ТЭС 2028 сылга үлэҕэ киирэрэ былааннанар. Икки энергоблоктан турар станция муҥутуур кыамтата 550 Мвт. Станция  айылҕа гааһынан үлэлиэҕэ.

«Бу станция  Саха сиригэр эрэ буолбакка, Уһук Илин уонна Илин Сибиир эрэгийиэннэригэр сүдү суолталаах бырайыак.  Итиэннэ  Ленскэй улууһун  сайдыытыгар төһүү  күүһүнэн  буолуоҕа”, — диэн эттэ Дмитрий Садовников.