Ленскэйгэ суол саахалыгар суоппар өлбүт

Алтынньы 16 күнүгэр Саха сирин Ленскэй улууһугар киһи өлүлээх суол быһылаана таҕыста. Бу туһунан ГАИ пресс-сулууспата иһитиннэрэр. Биэдэмистибэ иһитиннэрэринэн, саахал Талакаан сиригэр буолбут.

«Shacman» мааркалаах таһаҕас массыынатын 55 саастаах суоппара түргэнник айаннаан иһэн, тохтоон турар массыынаҕа тиийэн сааллыбыт. Суол саахалын түмүгэр таһаҕас массыынатын суоппара быһылаан буолбут сиригэр олохтон туораабыт. Бу быһылаан чахчытынан бэрэбиэркэ ыыталлар.