Ленскэйгэ тымныы уунан хааччыйыы борокуруор хонтуруолугар ылылынна

Өрөспүүбүлүкэ борокуруора Сергей Дябкин сорудаҕынан, Ленскэй улууһун борокуратуурата Ленскэй куорат «Севернай» түөлбэҕэ хас да элбэх кыбартыыралаах дьиэҕэ тымныы ууну хааччыйыы тохтообутугар бэрэбиэркэни тэрийдэ. Дьиэлэри тымныы уунан хааччыйыы турбата тоҥон, алдьаммытын түмүгэр тохтообут.

Суһал сулууспалар үлэлэрин сүрүннүүр сыалтан, быһылаан буолбут сиригэр Ленскэй улууһун борокуруорун солбуйааччыта хонтуруолга тахсыбыт. Билиҥҥи кэмҥэ алдьаныыны чөлүгэр түһэрии үлэтэ ыытыллар. Олохтоохторго ууну таһан тиэрдии тэриллибит. Борокуратуура бэрэбиэркэ кэмигэр олох-дьаһах хомунаалынай хаһаайыстыбатын сокуонун тутуһуутугар уонна атын да боппуруостарга сыанабыл биэриэҕэ. Гражданнар бырааптарын чөлүгэр түһэрии борокуратуура хонтуруолугар ылылынна, диэн СӨ Борокуратууратын пресс-сулууспата суруйар.