Ленскэйгэ ыксаллаах быһыы-майгы эрэсиимэ уһулунна

Ленскэй оройуонугар от ыйын 15 күнүттэн биллэриллибит муниципальнай таһымнаах ойуур баһаарыттан ыксаллаах быһыы-майгы эрэсиимин уһуллулар.

От ыйын 31 күнүнээҕи туругунан Ленскэй  оройуонугар үс ойуур баһаара регистрацияланна. Ааспыт сууккаҕа үс ойуур баһаара тохтотулунна.

«Балаһыанньа күүстээх ардахтар түһэннэр бигэтийдэ. Улууска арҕаа уонна илин өттүгэр зондировщик-сөмөлүөт туһаныллыбыта, онон үгүс ойуур баһаардарын ардах көмөтүнэн умуруорулунна. Билигин ойуур баһаарын бохсууга 41 киһи үлэлиир. Нэһилиэнньэлээх пууннарга куттал суоһаабат. Онон муниципальнай таһымнаах ойуур баһаарыттан ыксаллаах быһыы-майгы эрэсиими тохтотобут», — диэн Ленскэй улууһун  дьаһалтатын оҥорон таһаарыыны сайыннарыы управлениетын начаалынньыга Иван Беляев иһитиннэрдэ.

Улууска балаһыанньа бигэтийдэ, ол эрээри исписэлиистэр эрэгийиэннээҕии таһымнаах ыксаллаах быһыы-майгы эрэсиимэ салгыы үлэлиирин санаталлар. Олохтоохтору отон, тэллэй хомуйар кэмигэр тыа сиригэр баһаартан куттал суох буолуутугар туһуламмыт дьаһаллары салгыы тутуһалларыгар ыҥыралар.