Леонид Слепцов: “Сайдыы саҕахтара арыллан барбыттара”

 Өрөспүүбүлүкэтээҕи 2 №-дээх балыыһа-Мэдиссиинэ суһал көмөтүн киинин кылаабынай бырааһын уопсай боппуруостарга солбуйааччы Леонид Алексеевич Слепцов Өрөспүүбүлүкэ күнүнэн бэйэтин  санаатын маннык үллэһиннэ:

— Муус устар 27 күнэ —  Сахабыт Өрөспүүбүлүкэтигэр  сүдү суолталаах күн.  Ол курдук, биһиги убайдарбыт Максим Аммосов, Платон Ойуунускай, Исидор Барахов уонна кинилэр доҕотторун, биир санаалаахтарын күүстээх  туруорсууларынан,   Саха Өрөспүүбүлүкэтин Автономиятын ылбыт күннэринэн билинэбит.

Автономияны ылбыт  сылбытыттан  ыла Саха сиригэр сайдыы күүскэ саҕаламмыта. Үөрэхтээһиҥҥэ, доруобуйа харыстабылыгар, дьон бары дьарыктаах, үлэлээх буоларыгар улахан болҕомто ууруллан, сайдыы саҕахтара арыллыбыттара.

Мин биир  дойдулааҕым Максим Кирович Аммосов Саха Өрөспүүбүлүкэтигэр наука эспэдииссийэтин ыытан, олус улахан  хамсааһыны тэрийэн, экэниэмикэ сайдыытыгар улахан оруоллаах. Биһиги өрөспүүбүлүкэбит күн бүгүҥҥэ диэри сайда-үүнэ турарыгар биир дойдулаахпынан киэн туттабын.

Бу сыллар тухары: сэбиэскэй былаас да, уларыта тутуу да саҕана Сахабыт сирин салайан кэлбит уонна билигин  салайар  бырабыыталыстыбабыт, бэрэсидьиэннэрбит, Ил Дархаммыт күүстээх үлэни ыытан кэллилэр. Ол курдук, саҥаттан саҥа тэрилтэлэр арылланнар, үлэ миэстэтэ тахсар, инвестициялар сайдыыга тириэрдэллэр.

Доруобуйа харыстабыла сылтан сыл аайы иннин   диэки хардыылыыр, доруобуйа харыстабылын сүүнэ эбийиэктэрэ тутуллаллар, мэдиссиинэ үрдүк технологиялаах көмөтө, оҥоһуллар көмө хаачыстыбата уо.д.а.  нэһилиэнньэ олоҕо уһууругар көмөлөһөр.

Сүдү суолталаах муус устар  27 күнүнэн Сахам сирин олохтоохторун, биир дойдулаахтарбын  эҕэрдэлииин, Сахабыт сирэ үүнэ-сайда, чэчирии турдун!