Лев Павлов аан дойдуга бастыыр иһин күрэхтэһиигэ тустуоҕа

Тустуук Лев Павлов 21 саастарыгар диэри уолаттарга аан дойдуга бастыыр иһин күрэхтэһиигэ кыттарга Арассыыйа аатыттан сайаапкаҕа киирдэ. 

Тустуу аан дойдутааҕы түмсүүтүн (UWW) саайтыгар күрэхтэһиигэ кыттар спортсменнар ааттара таҕыста. Аан дойду түһүлгэтэ атырдьах ыйын 14-20 күннэригэр Иордания киин куоратыгар Аммаҥҥа ыытыллыаҕа.

Саха сириттэн төрүттээх тустуук Лев Павлов аата бэйэтин категориятыгар — 57 киилэҕэ диэри ыйааһыҥҥа испииһэккэ иккис турар. Бу ыйааһыҥҥа аан дойду 19 ааттааҕа баар.

Аан дойдуга бастыыр иһин күрэхтэһиигэ Арассыыйа уонна Беларусь тустууктара AIN (индивидуальный нейтральный атлет) былааҕынан тустуохтара.