Лев Павлов уонна Андрей Мидловец кыайыы көтөллөөх Дьокуускайга кэллилэр

Европа чөмпүйүөннэрэ  Лев Павлов уонна Андрей Мидловец кыайыы көтөллөөх төрөөбүт дойдуларыгар  эргиллэн кэллилэр. 

Санатан эттэххэ, Сербияҕа көҥүл тустууга  ыытыллыбыт   Саха сирин  бөҕөһө, Сунтаар уола  Лев Павлов (57 киилэ) 21 саастарыгар диэри биирдиилээн бастыыр иһин Европа чөмпүйэнээтигэр  кыһыл көмүс мэтээли ылары ситиспитэ. Финалга 8:6 счетунан  Азербайджан бөҕөһүн Васиф Багировы кыайбыта. Оттон Амма Чапчылҕаныттан төрүттээх Андрей Мидловец Европатааҕы чөмпүйэнээккэ кыһыл көмүс мэтээли аҕалан, төрөөбүт дойдутун дьонун олуһун үөрдүбүтэ. Кини Германия, Молдавия, Украина тустууктарын кыайталаан баран, Азербайджан бөҕөһүн Джамал Аббасовы 6:1 эрэллээхтик хоппута.

Бүгүн, от ыйын 10 күнүгэр, СӨ Успуордун министиэристибэтин, Сунтаар улууһун уонна Амма улууһун  делегациялара уолаттары көрүстүлэр.