ЛНӨ уонна ДНӨ: саҥа эрэгийиэннэртэн кэлбит дьон быраабын көмүскүүр үлэ салҕанар

Бүгүн, олунньу 21 күнүгэр, РФ Бэрэсидьиэнэ Владимир Путин РФ Федеральнай Мунньаҕар ЛНӨ уонна ДНӨ сүбэрэнитиэттэрин билиниигэ этии киллэрбитэ. Бу күн Владимир Путин уонна ЛНӨ салайааччыта Леонид Пасечник икки судаарыстыба өттүттэн доҕордоһуу, бииргэ үлэлээһин уонна хардарыта көмөлөһүү тустарынан дуогабарга илии баттаабыттара. Донбасс бу икки өрөспүүбүлүкэлэрин олохтоохторун үтүө баҕаларын, күүстээх дьулуһууларын Арассыыйа өйөөн, аан дойду каартатыгар ДНӨ уонна ЛНӨ диэн саҥа эрэгийиэннэр баар буолбуттара.
Бу өрөспүүбүлүкэлэртэн Саха сиригэр кэлбит дьон бырааптарын көмүскээһиҥҥэ туох үлэ барарын тула СӨ Киһи быраабыгар Боломуочунайа Сардаана Михайловна Гурьева тус санаатын үллэһиннэ.
— Донецкай уонна Луганскай Норуодунай Өрөспүүбүлүкэлэртэн кэлбит гражданнар бырааптарын көмүскээһин биһиги өрөспүүбүлүкэбит быраабы көмүскүүр институтун үлэтин биир суолталаах хайысхатынан буолар. Кинилэртэн биһиэхэ киирэр араас хабааннаах, үксэ гражданнар докумуонарыгар сыһыаннаах кыһалҕалары быһаарыыга көрдөһүүлэринэн туһааннаах уорганнары кытта бииргэ үлэлиибит. Бу кэлбит дьон докумуоннарын саҥаттан чөлүгэр түһэрэн оҥорууга, РФ гражданствотын ылыыларыгар көмөлөһөбүт.
Киһи быраабыгар Боломуочунай быһыытынан Дьокуускайга баар быстах олорор пууҥҥа кэлбит дьоннору болҕомто киинигэр тутан, олохтоох сирдэрин булларыыга көмөлөһө олоробут. Сорохтору быһа сибээскэ тутан, туох көмөҕө наадыйалларын туһунан өрүү билсэбит. Биир дьарыктанар боппуруоспутунан — бу кэлбит дьон оҕолорун оҕо саадтарыгар миэстэ булан киллэрии. Манна мээрийэни кытта кэпсэтии түмүгэр боппуруос быһаарыллар кыахтаммыта. СӨ Нэһилиэнньэ дьарыктаах буолуутун кэмитиэтин кытта ыкса үлэлээһин түмүгэр бу гражданнар идэ ылыыларын, идэлэринэн үлэни булууларын боппуруоһа быһаарылла турар. Доруобуйа харыстабылын өттүнэн биһиэхэ киирэр көрдөһүүлэргэ инбэлииккэ тахсыы боппуруостара кытта бааллар. Түгэнинэн туһанан, СӨ Доруобуйа харыстабылыгар министиэристибэтигэр, быраастарга СӨ Киһи быраабыгар Боломуочунайын этиилэрэ болҕомтоҕо ылыллан, быһаарыллан иһэллэригэр махталбын тиэрдэбин.
Өрөспүүбүлүкэҕэ кэлбит дьону кытта көрсүһүүлэрбит, приемнарбыт түмүктэринэн итиэннэ Киһи быраабыгар федеральнай Боломуочунай Татьяна Николаевна Москалькова сүрүннээһининэн биһиги ЛНӨ Киһи быраабыгар Боломуочунайын кытта сибээс олохтуурбут табыллыбыта. Онон кинини кытта дьон быраабын туһугар бииргэ үлэлиибит, ДНӨ уонна ЛНӨ аатын ылбыт саҥа эрэгийиэннэртэн Саха сиригэр кэлбит дьон быраабын көмүскүүр үлэ тэтимнээхтик бара турар.
2022 сылга биһиги «Мы – патриоты» өрөспүүбүлүкэтээҕи аахсыйаны СӨ ИДЬМ кытта бииргэ тэрийэн ыытыыбытын Ил Дархан өйөөн, бу аахсыйа көхтөөхтүк ыытыллыбыта. Аахсыйа сыала – эдэр ыччаты дойдуга бэриниилээх буолууга тардыһыннарыы, аҕа көлүөнэ саҕалаабыт үтүө дьыалаларын чөл тутан сайыннарыы, утумнааһын, ыарахан быһыыга-майгыга түбэспит дьоҥҥо көмөлөһүү буолар.
Бу күҥҥэ диэри «Мы – патриоты» аахсыйа алта түһүмэҕин ыыттыбыт. Онно оскуола оҕолоро, тулаайах оҕолор, инбэлиит дьон, уопсайынан, барыта 34 тыһыынча кэриҥэ киһи хабылынна. Аахсыйабыт чэрчитинэн Аҕа дойду устуоруйатын билиигэ туһуламмыт араас күөн күрэстэр, биир сомоҕо буолууга, хамаанда туһугар кыһаныыга, биир санаанан кыайарга күүстээх дьулууру үөскэтэр спортивнай күрэхтэһиилэр ыытылыннылар. Бу тэрээһиннэргэ «Юнармия” уонна Кадетскай оскуола улахан оруолу ыллылар. Саха тыйаатыра аахсыйаны күүскэ өйөөн, Щепкин училищетын устудьуоннарын кытыннаран, устудьуоннар Дьокуускайга баар инбэлииттэр интэринээт-дьиэлэригэр тиийэн, маастар-кылаастары ыыппыттара. Бу аахсыйаҕа урбаанньыттар өйөбүллэрин бэлиэтиир тоҕоостоох. Ол курдук «Аморе” банкеттыыр сааланы босхо биэрэн, араас пансионаттарга олорооччулар, приемнай дьиэ кэргэттэр мустаннар, чэй иһиилээх саха эстрадатын кэнсиэрин көрөн дуоһуйбуттара. Аахсыйабыт бүтэһик түһүмэҕэр 20-чэ улуустан 32 тулаайах оҕолор кэлэннэр, патриотическай ырыа куонкурсугар кыттыбыттара. Бу куонкурус түмүктэниитигэр оҕолорго бириистээх кэлбит бары спонсордарбытыгар барҕа махтал буоллун.
Бу аахсыйа киэҥ далааһыннаахтык ыытыллыбытыгар көмө, тирэх буолбут СӨ Ыччакка уонна социальнай коммуникацияларга министиэристибэтэ, Үөрэххэ уонна билимҥэ министиэристибэтэ, улуустар муниципальнай тэриллиилэрэ, СӨ Ил Түмэнэ, бырабыыталыстыбата уо.д.а. курдук, бары көхтөөх кыттааччыларбыт өйөбүллэрэ, көмөлөрө улахан. Онон бу тэрээһиммит ситиһиилээх буолла.
Оҕолору дойдуга бэриниилээх буолууга иитиигэ, дьиэ кэргэн, оҕо, ыччат, киһи бырааптарын араҥаччылааһыҥҥа биһиги дириҥ эппиэнэспитин өйдүүбүт, ол туһугар үлэбит салҕанар.