Луганскай народнай өрөспүүбүлүкэҕэ «Сокол» вездеходтар күлүүстэрэ туттарылынна

РФ Бэрэсидьиэнигэр Саха сирин бастайааннай бэрэстэбиитэлэ — СӨ Бырабыыталыстыбатын Бэрэссэдээтэлин бастакы солбуйааччы,  байыаннай сулууспалаахтары өйүүр кэлим сүрүннүүр киин бэрэссэдээтэлэ Андрей Федотов Ил Дархан Айсен Николаев аатыттан «Боотур» этэрээт уонна «Ахмат» батальон байыастарыгар Саха сиригэр оҥоһуллубут «Сокол» вездеходтары туттартаата.

Андрей Сандаминович бэлиэтээн эппитинэн, кинилэр бары бииргэ сомоҕолоһон, Арассыыйа кыайарын туһугар туруулаһаллар. «Ахмат» батальоҥҥа «Сокол» вездеходу «Якудза» диэн позывнойдаах байыас сайаапкатынан бэрилиннэ. «Хомойуох иһин, кини бу түгэҥҥэ диэри тиийбэтэ, сэрии хонуутугар хорсуннук оҕунна. Кини хорсун, быһаарыылаах күүстээх санаата бииргэ сулууспалыы сылдьар доҕотторун сүрэҕэр үйэлэргэ хаалыаҕа. Бу туохтан да иҥнибэт тиэхиньикэ эһиэхэ күүс-көмө буоллун», — диэн Андрей Федотов эттэ.

«Ахмат» хамандыыра «Шрам» Саха сирин олохтоохторугар уонна чахчы эр санаалаах буойуну иитэн таһаарбыт төрөппүттэргэ махтанна. «Саха уолаттарын кытта бииргэ сулууспалыыр бу чиэс-бочуот. Саха сирэ туохтан да куттаммат, тулуурдаах байыастары иитэн-такайан таһаарар. Оттон Саха сирин көмөтүгэр биһиги бары ис сүрэхпититтэн махтаныах эрэ тустаахпыт «, — диэн эттэ.

«Злой» позывнойдаах «Боотур» батальон хамандыыра Саха сирин олохтоохторун быһаччы көмөлөрүнэн кыайыы күнтэн күн чугаһаан иһэрин туһунан эттэ.