Любовь Алексеева: «Хоккеист сиэммэр ыалдьа кэллим»

Дьокуускай куорат олохтооҕо Любовь Борисовна Алексеева бу күннэргэ Кемерово уобалаһыгар ыалдьыттыыр. Кини манна «Азия оҕолоругар» кыттар спортсмен сиэнигэр ыалдьа диэн анаан-минээн кэлбит.

«Мин сиэммэр Максим Татариновка ыалдьа кэлбитим. Кини хоккейга Саха сирин сүүмэрдэммит хамаандатын хапытаанынан буолар. Сиэним «Азия оҕолоругар» күрэхтэһэрин анаан көрөөрүбүн, үлэбиттэн уоппуска ылан туран Кузбааска кэлбитим. Максим түөрт сааһыттан хоккейынан дьарыктанар, биир да оонньуутун көтүппэккэ көрөбүн. Ол аайы олус долгуйабын, бу бүгүн хамаандабытыгар ыалдьаммын күөмэйим бүтүөр диэри хаһыытаатым», — диэн Любовь Борисовна кэпсээтэ.

Хоккейга Саха сирин сүүмэрдэммит хамаандатын састааба: вратардар Андрей Совчико, Игорь Дорогов, көмүскээччилэр Никита Кунгурцев, Максим Татаринов (хапытаан), Лев Ломовцев, Стас Соболев, Леонид Лахман, Владимир Глухов, Денис Костенко, Егор Загудаев, нападающайдар Александр Вебер, Дмитрий Рябинцев, Никита Бунаков, Иван Бураков, Александр Шевель, Борис Загидуллин, Егор Ничухрин, Никита Соболев, Артём Власов, Ефим Малышкин, Максим Котов, Всеволод Изатуллин. Хамаанда тириэньэрдэрэ — Леонид Бирюков уонна Андрей Малышкин.

Хоккейга күрэхтэһиилэр Новокузнецкай куоракка буола тураллар. Саха сирин сүүмэрдэммит хамаандата бэҕэһээ Кузбаас хамаандатын бастакы оонньууга кыайбыт эбит буоллаҕына, бүгүҥҥү оонньууга хотторуу хомолтотун биллэ. Бүгүн уолаттарбыт Казахстаан хамаандатыттан 11:0 ахсааҥҥа хоттордулар. Онон сарсын Уһук Илиҥҥи федеральнай уокурук хамаандатын кытта күрэхтэһиэхтэрэ.