Любовь Борисова: «Ааспыт 2022 сыл аан дойду үрдүнэн элбэх уларыйыыны аҕалла»

«Сахафильм» режиссера, «Кэрэни көрбүт» киинэ ааптара Любовь Борисова ааспыт 2022 сыл туһунан санаатын үллэһиннэ:

– Ааспыт 2022 сыл аан дойду үрдүнэн элбэх уларыйыыны аҕалла. Ким эрэ кэлэр-барар, ким эрэ төрүүр. Ол да буоллар, айылҕа сокуонунан хайдах­таах да буурҕа кэнниттэн халлаан халлар, тыйыс тымныы кэнниттэн саас кэлэр. Ол иһин сыл бүтүүтүгэр, кыһын муҥу­таан турдаҕына, ахсынньы 22 күнүгэр биһиги сайыҥҥы киинэбит дьон дьүүлүгэр тахсыбыта мээнэҕэ буолбатах дии саныыбын.

Саха былыр-былыргыттан кыһын ортото балаҕаныгар мустан самаан сайынын саныыра, туох баар кэрэни олоҥхоҕо хоһуйан көрөрө. Ол курдук биһиги эмиэ кыһыммытын кылгатан, сайыҥҥы кэрэни көрүөҕүҥ! Сахам дьонун «Кэрэни көрбүт» диэн киинэни көрөн, санааҕытын сайҕанаргытыгар, дууһаҕытын чэпчэтэргитигэр ыҥырабын! Бу “Сахафильм” киинэ хампаанньатын аатыттан саха дьонугар өрөспүүбүлүкэбит 100 сыллаах уонна «Сахафильм» 30 сыллаах үбүлүөйүгэр үтүөкэннээх бэлэҕинэн буолар.