Люлия Григорьева: «Аҕам саастаах дьон, кинилэргэ кыһамньы, көмө туһунан этиитин астынным»

Ытык сүбэ бэрэссэдээтэлэ, Сэрии, үлэ, Сэбилэниилээх күүстэр уонна быраабы араҥаччылыыр уорганнар бэтэрээннэрин уопсастыбаннай тэриллиилэрин чилиэнэ Люлия Григорьева Ил Дархан Айсен Николаев быйылгы Анал этиитигэр санаатын үллэстэр:

— Биһиги Ил Дархаммыт Айсен Николаев быйылгы Анал этиитин истэн бараммыт, ордук биэнсийэлээхтэр, сынньалаҥҥа олорооччулар, өрөспүүбүлүкэбит сайдыы суолунан баран иһэр диэн үөрдүбүт. Ол курдук саҥа креативнай экэниэмикэҕэ үлэлэһэн эрэллэрэ миигин ордук үөрдэр. Ыччаты үлэҕэ тардыы, эдэрдэр үлэлээх буолалларыгар туһалаах буолуоҕа дии саныыбын.

Итини таһынан хас биирдии ыалга гааһы киллэриигэ ситиһии туһунан этилиннэ. Тыа сирин гаастааһын, аҕам саастаах дьоҥҥо толору хааччыллыылаах дьиэҕэ нус-хас олороллоругар, үйэлэрэ өссө уһууругар кыаҕы биэриэ дии саныыбын. Уопсайынан, аҕам саастаах дьон, кинилэргэ кыһамньы, көмө дьаһалларын туһунан этиитин астынным. Итини таһынан кырдьаҕастарга сыһыаннаах этиини астына иһиттим. Урукку пионерскай лааҕырдар курдугу тэрийиэххэ диэн этиини биһирээтим, былырыын манныгы Орто Халыма улууһа саҕалаабыта. Олор уопуттара өрөспүүбүлүкэҕэ тарҕанан эрэр диэммин үөрэ иһитттим. Онон кырдьаҕастар, наар куруорка эрэ барбакка, маннык лааҕырдарга сынньалаҥ да, үлэ лааҕыра да буоллун, бириэмэлэрин туһалаахтык, олох үөһүгэр атаарыа этилэр.

Ону таһынан биһиги, кырдьаҕастар, 80-н ааспыт дьон көрдөхпүтүнэ, киһи бэйэтин доруобуйатыгар култууралаах, этин-хаанын көрүнэр буоллаҕына, үйэтэ уһуур кыахтаах.