М.Е.Николаев аатынан Дьокуускай куорат 40-с нүөмэрдээх оскуолата бэрэсидьиэн оскуолаларын ситимигэр киириэҕэ

Быйыл балаҕан ыйыгар аан маҥнай аһыллар, өрөспүүбүлүкэ биир элбэх үөрэнээччилээх, М.Е.Николаев аатын сүгэр Дьокуускай куорат 40-с нүөмэрдээх оскуолата Бэрэсидьиэн оскуолаларын ситимигэр киириэҕэ. Ити туһунан Ил Дархан үөрэх үлэһиттэрин мунньаҕар иһитиннэрдэ.

Төһө даҕаны кэккэ уустуктар баалларын иһин, саҥа үөрэх эбийиэктэрин тутуу, өрөмүөннээһин, мастарыскыайдары тэрийии үлэтэ  саҥа национальнай бырайыактар, Уһук Илини сайыннарыы бырагырааматын иитинэн барарын кини ыйда. Саҥа үөрэх дьылын көрсө саҥа оскуола аһылларын иһитиннэрдэ.

“Балаҕан ыйын 1 күнүгэр Дьокуускай куоракка, ДСК түөлбэтигэр, өрөспүүбүлүкэҕэ саамай улахан, 17 тыһ. кв.м. тахса иэннээх оскуоланы аһабыт. Онно номнуо биһиги Бастакы Бэрэсидьиэммит Михаил Ефимович Николаев аата иҥэриллибитэ – улахан чиэс, эппиэтинэс. Бастакы Бэрэсидьиэн аатынан оскуола кини хас биирдии оҕо эргиччи сайдар кыаҕын арыйар идиэйэтин толорор холобурунан буолуохтаах. Онон Билии күнүн иннинэ, Дьокуускай куорат 40-с нүөмэрдээх оскуолата устуоруйаҕа киирэр Билии күнүн иннинэ, Михаил Ефимович Николаев көҕүлээһининэн тэриллибит Бэрэсидьиэн оскуолаларын ситимин кэккэтигэр киллэрэр туһунан Ыйаахха илии баттыам” – диэн эттэ.

Санатан эттэххэ, манна өрөспүүбүлүкэ биллэр-көстөр, үрдүк көрдөрүүлээх оскуолалара – гимназиялар, лиссиэйдэр киирэллэр.