Маай бырааһынньыгар арыгы атыыта хааччахтаныа

Дьокуускай куорат дьаһалтата ыам ыйын 1 күнүгэр 14:00 чаастан 17:00 чааска диэри киин куорат сорох уулуссаларыгар итирдэр утахтары атыылыыр маҕаһыыннарга хааччахтыыр дьаһалы олохтоото.

Ол курдук, Дьокуускай куорат Чернышевскай, Ярославскай, Кулаковскай, Петровскай, , Лермонтов, Ф.Попов, Дзержинскэй, Хабаров, Орджоникидзе, П.Алексеев, Киров, Поярков, Курашов, Короленко, Горькай, Ойуунускай, Аммосов, Октябрьскай уулуссаларга, Ленин проспегар уонна Глухой переулокка баар маҕаһыыннарга арыгы атыыта үөһэ ыйыллыбыт бириэмэҕэ бобулунна. Урут бу уулуссаларынан үлэһиттэр кэлэктииптэрэ сэлэлээн хаамсаллара, дьон-сэргэ маассабай күүлэйгэ тахсара.

Быйыл дьону түмэр, ыам ыйын бырааһынньыктарын сэлэлээн хаамыыларын, дойдуга буола турар быһыынан-майгынан сибээстээн боппуттара. Ол гынан баран, мэрия пресс-сулууспата этэринэн, дьон син-биир бырааһынньыкка уулуссаҕа тахсыахтара, араас атын тэрээһиннэргэ сылдьыахтара, онон арыгыны, пиибэни атыылааһын хааччаҕын дьаһала оннунан хаалла.