Мааны, маҥан табалар…

Өлөөн улууһугар пааматынньыктарга харыстабыллаахтык сыһыаннаһаллар. Ол туоһутунан улуус киинин килбэйэр киинигэр туруоруллубут пааматынньыктары быйылгы кыһын курдук хаардаах дьылга хаардаан, ыраастаан тураллара сөхтөрөр. Манна дьиэ таһын көрөр-истэр уолаттар оруоллара сүҥкэн.

Маннык маҥан табалар Өлөөҥҥө эрэ бааллар быһыылаах. Маҥан, мааны табалар. Бу ойуох курдук кынталдьыһан тураллар, эбэни өҥөйөн. “Биһиги киэн туттуубут – маҥан таба”, – диир киэн туттан туран, олохтоох «Өлөөн историко-этнографическай Хотугу норуоттарын түмэлин» пуондатын сүрүн харайааччыта Саргылана Петровна Павлова.

Оттон  нөҥүө өттүгэр улуустарын сайдыытыгар дьоһун кылаатын киллэрэн, дьонугар-сэргэтигэр үтүө өйдөбүлү хаалларбыт баһылыктарын Иванов Александр Степанович сырдык аатын үйэтитэн туруорбут пааматынньыктара эмиэ киһи хараҕар ыраахтан быраҕыллар. Пааматынньыгар Александр Степановиһы илиитигэр алмааһы тутан турар курдук оҥорбуттар уонна ол ыраахтан чаҕылыйар курдуга – улуус сайдыытын кэрэһилиир курдук.  Аттыгар турар хара гитара – кини эдэр сааһа, Өлөөнү хоһуйан ыллаабыт уонна ылламматах ырыалара, ыра санаата барыта бу муусука инструменыгар түмүллүбүт быһыылаах. Гитараҕа ыллыырын сөбүлүүрүн иһин итинник оҥордохторо. Кырдьык, салайааччы эрэ барыта гитараҕа оонньооботох буолуохтаах. Уонна билиитэлэргэ Александр Степанович баһылыгынан үлэлээбит сылларыгар ситиһиилэрин чопчулаан, суруйбуттар. Бу эмиэ – бэйэтэ устуоруйа. Ону олохтоохтор бэркэ билэр, сыаналыыр, бигэргэтэр, махтанар буолуохтаахтар.  Үтүө киһи аата төрөөбүт дойдутугар ити курдук үйэлэргэ умнуллубакка, бэйэтин ааттата, саната туруоҕа. Уонна бу сквергэ сайын аайы сибэкки силигилиэ…

Өлөөҥҥө тиийдэххитинэ, хайаан да манна таарыйаарыҥ.