Хаартыска -- Ольга Прудецкая тиксэриитэ.
Туймаада Ыһыаҕар улуустар землячестволара түһүлгэрин киэргэтэн, биир дойдулаахтарын түмэн, кинилэр ахтылҕаннарын таһааралларыгар тоҕоостоох усулуобуйа тэрийиилэрэ үтүө үгэскэ кубулуйда.
Быйыл Туймаада ыһыаҕар “Улуус бастыҥ түһүлгэтэ” күрэскэ Дьааҥы улууһун землячествота түһүлгэлэрин киэргэтиигэ ураты болҕомтолорун ууран, бочуоттаах 2-с миэстэни ыллылар. Бу туһунан землячество салайааччыта Ольга Прудецкая маннык кэпсиир:
— II үрдэлгэ тахсан, “Маанылаах түһүлгэ” номинацияҕа тиксэн, быйыл Дьааҥы улууһун түмсүүтэ үөрүүбүт сүҥкэн.
Куорат ыһыаҕын иннинэ биир дойдулаахтарбытын мунньан, иккис сылын анаан ыһыах ыһан, дьоммутун-сэргэбитин үөрдэн, араас ис хоһоонноох култуурунай уонна спортивнай тэрээһиннэри тэрийэн, Туймаада ыһыаҕын олохтоохтук бэлэмнэнэн көрсөр буоллубут. Бу маннык эрдэттэн дьаһанар олус көдьүүстээх эбит. Буолаары турдаҕына эрэ түбүгүрбэккэ, эрдэттэн өйдүүн-санаалыын кытта бэлэмнэнэҕин. Ол да иһин буолуо, улууспут ыһыаҕын сүрүн ирдэбилинэн нэһилиэктэр түһүлгэлэрин киэргэтии, төрүттэрин билиһиннэрии буолар. Быйылгы ыһыахха улуус 17 нэһилиэгиттэн 12 нэһилиэк түһүлгэ тэриннилэр. Онон биһиги Туймаада ыһыаҕар түһүлгэбитин киэргэтиигэ түбүгү көрсүбэтибит – бэйэбит ыһыахпытыгар миэстэлэспит түһүлгэлэртэн саамай интэриэһинэй, үчүгэй өрүттэрин ыллыбыт.
Холобур, былырыыҥҥы ыһыахха түһүлгэ күрэҕэр сартаҥнар наһаа интэриэһинэй, прикладной ускуустубаны көрдөрөн кыайбыттара. Быйылгы ыһыахха адыаччылар сандалылара Дьааҥыбыт көтөрүттэн, сирин аһыттан оҥорбут астара-үөллэрэ кэрэхсэппитэ. Маанылаах остуолбут дьүүллүүр сүбэ ураты болҕомтотун тарта.
Дьэ, ити курдук түһүлгэбит киэргэтиитигэр биир дойдулаахтарбыт, маастартарбыт, уус-уран тарбахтаах иистэнньэҥнэрбит бэйэлэрин үлэлэрин көрдөрүүгэ таһаарбыттара биһиэхэ улахан күүс-көмө буолла. Кинилэр ааттарын киэн тутта ааттыыбыт: Тамара Горохова, Яна Климовская, Наталья Бурнашева. Бу дьоммут биһиги түмсүүбүт көхтөөх дьоно. Кинилэргэ өрүү күүс көмө буолалларыгар улаханнык махтанабыт. Нэһилиэктэрбит бары түмсүү салайааччылардаахтар. Кинилэр үгүс өрүттээх үлэни ыытан, элбэх киһини түмэ тардан, улууспут түһүлгэтин бары куолаан киэргэттибит. Бу ураты тэрээһин барыбытын ордук түмтэ. Ол курдук, Эҥэттэн төрүттээх Валентина, Александр Бурцевтар, Арыылаахтан Валентина Быкова, Барыластан Алена Стерлева-Слепцова, Игнатий Слепцов, Сартантан Римма Никифорова, Чөрүмчэттэн Зарьяна Аркадьева, Адыаччыттан сылдьар Елена Чирикова, Жанна Чирикова, Раиса, Михаил, Еремей, Клим Слепцовтар, Мария Новгородова, Баатаҕайтан Андрей Максимов, Нина Петрова, Суордаахтан Кристина Алексеева, Любовь Стручкова төрөөбүт дойдуларыгар олус бэриниилээхтэрин көрдөрдүлэр. Өссө да өрүү маннык бары түмсүүлээх уонна көхтөөх буолуохха, тапталлаах төрөөбүт Дьааҥыбыт аатын дорҕоонноохтук ааттата туруохха!
Ити курдук, түмсүүлээх буолан 30-тан тахса улуустан 2-с бочуоттаах миэстэни ылбыт дьааҥылар өссө да ситиһиигэ дьулууһулара күүстээх, толкуйдара кэскиллээх.
Арина кыра оҕо ытыырыттан уһугунна. Арай өндөс гынан көрбүтэ, үстээх уола, алталаах кыыһа муостаҕа тохтубут…
Сай ортото буолла. Үгүс киһи уоппуска ылан ким оттуу, отоннуу, ким муораҕа сөтүөлүү тарҕаһар кэмэ…
2024 сыл тохсунньутугар Сунтаар улууһун Элгээйи сэлиэнньэтигэр быраас амбулаторията үөрүүлээх быһыыга-майгыга үлэҕэ киллэриллэн, 1,5 тыһыынчаттан…
Улуу Кыайыы 80 сылынан уоттаах сэрии толоонугар, ыраах тыылга да бэйэлэрин олохторун кэрэйбэккэ сэриилэһэн, охтон…
Кэлиҥҥи сылларга өрөспүүбүлүкэ оскуолаларыгар урбаан кииннэрэ тэриллэн, оскуола оҕолоро сувенир оҥоруутуттан саҕалаан, түргэнник ситэр салааны…
Саха сиригэр ханна даҕаны өрүс суола аһыллан, айан-сырыы үксээтэ. Айан хаһан даҕаны чэпчэки буолбат. Сыана…