Маасканы кэтии ирдэниллэн эрэр. Кимнээххэ?

Ааспыт нэдиэлэҕэ кириип уонна ОРВИ Саха сирин 9 улууһугар элбээбитэ бэлиэтэннэ. Өрөспүүбүлүкэ суһал ыстаабыгар иһитиннэрбиттэринэн, Амма, Бүлүү, Горнай, Ленскэй, Мииринэй, Мэҥэ Хаҥалас, Нерюнгри, Өлүөхүмэ, Сунтаар улуустарыгар уонна Дьокуускай куоракка эбилиннэ.

Суһал ыстаап ону тэҥэ Дьокуускайга уонна чугас сытар улуустарга коронавирус саҥа инфекцията элбээбитин туһунан иһитиннэрдэ. Саха сиригэр Роспотребнадзор управлениетын   начаалынньыга Маргарита Игнатьева иһитиннэрбитинэн, билиҥҥитэ коронавирус атын көрүҥнэрэ буолбакка, омикрон баара бэлиэтэнэр.

Суһал ыстаап мунньаҕын түмүгүнэн, эргиэн тэрилтэлэрин уонна элбэх дьон сылдьар тэрилтэлэрин салайааччылара үлэһиттэригэр маасканы кэтэллэрин хааччыйаллара быһаарылынна. “Ордук  мэдиссиинискэй тэрилтэлэргэ мааска эрэсиимин тутуһар наада. Оскуолаларга уонна оҕоуһуйааннарыгар сарсыардааҥы ыраастаныыны ыытыахха, ыалдьар оҕолор оскуолаҕа уонна уһуйааҥҥа кэлиэ суохтарын наада”, —диэн эрэгийиэн Бырабыыталыстыбатын бэрэссэдээтэлин солбуйааччы  Ольга Балабкина эттэ.

Ону таһынан улуустар баһылыктара Саҥа дьыллааҕы оҕо бырааһынньыктарын ыытарга биир кылааһы эбэтэр бөлөҕү эрэ киллэриини хааччыйалларыгар этилиннэ.