«Маастардар куораттара» үлэлээтэ

От ыйын 1-3 күннэригэр Дьокуускайга Эргэ куоракка «Маастардар куораттара» норуот уус-уран оҥоһуктарын бэстибээлэ үлэлиир. Бэстибээлгэ кытта диэн араас улуустартан 50-ча маастар кэллэ. Бу бэстибээл «Азия оҕолорун» култуурунай бырагырааматын чэрчитинэн ыытыллар.

«Азия оҕолоро» норуоттар икки ардыларынааҕы спортивнай оонньуулар ыалдьыттара бу бэстибээлгэ кэлэн, маастардар оҥоһуктарын, араас сувенирдары атыылаһыахтарын, саха култууратын кытта билсиэхтэрин сөп.

Маны тэҥэ, маастардар баҕалаахтарга маастар-кылаастары ыытыахтара. Онон бу үс күн устата туоһунан, кылынан, туойунан, о.д.а. оҥоһуктары оҥорорго үөрэтиэхтэрэ. Кыбытык тигиигэ, оҕуруонан тиһэргэ үөрэниэн баҕалаах дьон бу маастардары кытта атах тэпсэн олорон, элбэххэ үөрэниэхтэрин, интэриэһинэй маастар-кылаастарга сылдьыахтарын сөп.

Бэстибээлгэ мастан, муостан, көмүстэн, туостан, тимиртэн оҥоһуктар бааллар. Куукуланы оҥорооччулар, иистэнньэҥнэр, оҕуруону тиһээччилэр бэйэлэрин үлэлэрин көрдөрүүгэ туруоруохтара.

Саха сирин маастардарын түмсүүлэрэ быыстапкалыахтара. Саха сиригэр 5 тыһыынчаттан тахса киһи уус-уран оҥоһуктары оҥорорунан дьарыктанар, кинилэртэн 200-тэн тахса киһи «норуот маастара» диэн ааты сүгэр.