Дьон ортотугар маат-куут түһэриигэ ыстараап суумата 10 төгүл үрдүөҕэ

Госдуума дьокутааттара мааты-кууту кытта охсуһарга этии киллэрдилэр.

Ол курдук, куйаар ситимигэр, дьон ортотугар, сыанаҕа, кэнсиэркэ, артыыстар ортолоругар мааты-кууту кытта охсуһууга сыаллаан, ыстараап сууматын үрдэтэргэ, ону таһынан эппиэтинэскэ тардалларыгар этии киллэрдилэр. Манна ким баҕарар дакаастабыллаах буоллаҕына, сайабалыанньа суруйуон сөп. Оттон уулуссаҕа мааты-кууту истибит  полиция үлэһитэ боротокуол эрэ толоруон наада. Куйаар ситимигэр мааты-кууту кытта утары охсуһууну Роскомнадзор сүгүөҕэ. Холобур, сокуон барылын ылыннаҕына,  сыанаттан артыыстар үөхсэр түгэннэригэр кэнсиэри тэрийээччилэр эппиэтинэстэн куотунуо суохтара уонна 700 тыһ. солк. диэри ыстараап төлүөхтэрэ. Оттон артыыстар  бэйэлэрэ 100-тэн 150 тыһ. солк. диэри ыстарааптаныахтара.

«Пилот» бөлөх лидерэ Илья Черт этэринэн, билигин үгүс оскуола үөрэнээччилэрэ бэйэлэрин тылларыгар элбэхтик мааты-кууту туһаналлар. Ыччат кыбыстыбакка уопсастыбаннай миэстэлэргэ үөхсэллэр, онон бу кыһалҕа чахчы буолар диэн эттэ Илья Черт.

Мааты-кууту чугас дьонун уонна доҕотторун ортотугар эрэ туһаныахха сөп, ол эрээри аһаҕастык, дьон ортотугар кэнсиэркэ, киинэҕэ, тыйаатырга үөхсэр табыллыбат диир Арассыыйа артыыһа, РФ норуодунай артыыһа Валерий Баринов. Кини этэринэн, ускуустубаҕа мааты-кууту туһаныы култуура тиийбэт көрдөрүүтэ буолар.