Магадаанныыр тимир суол Өймөкөөн улууһун Томторунан ааһыаҕа

Бүгүн Өймөкөөн улууһун муниципальнай нэһилиэктэрин уонна оробуочай бөһүөлэктэрин сайыннарыыга туһуламмыт киэҥ ыҥырыылаах стратегическай сиэссийэҕэ кэккэ кэскиллээх боппуруоһу дьүүлэстилэр. 

Ол суолталаах боппуруостар ортолоругар Магадаанныыр тимир суол Өймөкөөн улууһунан ааһыыта буолла. «Саха сирин тимир суоллара» АУо Бэрэстэбиитэлэстибэтин салайааччытын солбуйааччы Людмила Ефремова хампаанньа Аллараа Бэстээх-Магадаан тимир суол тутуутун бастакы түһүмэҕин — Аллараа Бэстээх-Хаандыга тутуутун бастакы тэрээһин боппуруостарыгар туох үлэ бара турарын сырдатта.

— Тимир суол өрөспүүбүлүкэ биэс улууһун: Мэҥэ Хаҥалас, Чурапчы, Таатта, Томпо, Өймөкөөн хабан ааһыаҕа. Өймөкөөн улууһугар сыһыаннааҕы эттэххэ, бу оройуон Күбүмэтин, Өймөкөөн, Томторун, Кураанах Салаатын, Орто Балаҕанын хабыаҕа. Өймөкөөнүнэн ааһан, Магадаан уобалаһын түөрт оройуонунан ааһыаҕа. Иккис түһүмэх — Хаандыгаттан Магадан уобалаһыгар тиийэр тимир суолу тутуу. Бу — 825 км.
Магадааҥҥа диэри тимир суолу тутуу туһунан кэпсэтии өссө 1952 сылтан барбыт эбит. Ол эбэтэр Арассыыйа хотугулуу-илиҥҥи эрэгийиэнин сайдыытыгар тимир суол сүҥкэн оруоллааҕа олох эрдэттэн толкуйдаммыт, диэн бэлиэтээтэ Людмила Ефремова.

Өймөкөөн улууһун олохтоохторо бу сонуну иһиттэхтэринэ үөрэллэрэ чахчы. Бу иннинэ таайа сатыы сылдьыбыттара — Муоманан Уус-Ньаранан Томторунан ааһар диэн араас иһиттиннэрии баара. Билигин бу боппуруос чопчу быһаарылынна — тимир суол Өймөкөөн улууһун Томторунан ааһар буолла!