Маҕаһыын атыыһыта кассаттан харчыны уорууга кыттыгастааҕа билиннэ

Саха сиринээҕи ИДьМ сулууспатын 3 №-дээх полициятын дьуһуурунай чааһыгар киин куоракка Дзержинскай аатынан уулуссаҕа турар бородуукта маҕаһыынын бэрэстэбиитэлиттэн, кассаттан 8 тыһыынчаттан тахса харчы уоруллубутун туһунан сайабылыанньа суруйбут.

Суһал-көрдүүр дьаһалларынан Кыргызстан Өрөспүүбүлүкэтин 26 саастаах атыыһыта уорууга кыттыгастааҕынан тутулунна.

Силиэстийэ быһаарыытынан, уорбаланааччы дьахтар ааспыт сыл ахсынньытыгар бу эргиэн туочукатыгар үлэҕэ киирбит. Үлэтин кэмигэр дьахтар  атыылаһааччылар табаары харчынан төлүүллэрин кэмигэр хармааныгар укта сылдьыбыт. Онон буруйданааччы 8 тыһыынчаттан тахса суума харчыны иҥэриммит. Холуобунай дьыала тэрилиннэ. Буруйданааччы 2 сылга диэри болдьоххо көҥүлэ быһыллыан сөп. Бу туһунан Саха сиринээҕи ИДьМ пресс-сулууспата иһитиннэрэр.