Маҕаһыынтан атыылаһыма, бэйэҥ оҥоһун

Бу күннэргэ маҕаһыынтан атыылаһыллыбыт соктара түүнүгүрбүтүн, хара хойуу эттиктээҕин туһунан видео социальнай ситимнэринэн киэҥник тарҕанна. Итини көрөн биир кэмҥэ дьаабылакаттан уонна апельсинтан бэйэм утах оҥорор буола сылдьыбыппын өйдүү биэрдим. Маҕаһыыҥҥа атыыланар соктан туох даҕаны уратыта суох, өссө ордук курдук.

Апельсинтан утах

Туох идэнэр:

— апельсин – 3-4 апельсин,

— саахар – 350-400 кыраам,

— лимон – аҥаара эбэтэр лимон кислотата – 10-20 кыраам (ким хайдах сөбүлүүрүнэн),

— ыраас уу.

Хайдах бэлэмниибит: апельсины бысталыахпыт иннинэ чаас курдук мууһурба (морозильникка) эбэтэр түүн устата тоҥорбоҕо (холодильникка) туруорабыт. Сөрүүн, хас да ууга кичэйэн сууйан баран хаҕын кытта мясорубкаҕа эрийтэрэбит эбэтэр блендердиибит. Бытархай, хомуога суох, биир тэҥ маасса буолара ирдэнэр. Бэлэм маассаны үс лиитэрэлээх бааҥкаҕа кутабыт уонна үрдүгэр 1,5 лиитэрэ оргуйбут ууну саба кутабыт. Булкуйан баран 2-3 чаас сөрүүн сиргэ туруорабыт. Сойбутун кэннэ сиидэлиибит, маассаҕа баар убаҕаһын күүскэ ыгабыт. Үрдүгэр саахар, лимон аҥаарын ыган уутун эрэ (лимон кислотатын) кутан булкуйабыт. Миискэҕэ 3 лиитэрэ ууну оргутабыт уонна үрдүгэр апельсиннаах маассаны кутан ытыгынан дэлби булкуйабыт. Сойутабыт. Бүттэ, битэмииннээх, дьиэ утаҕа бэлэм.

Дьаабылакаттан утах

Туох ирдэнэр:

— күөх дьаабылака – 4 устуука,

— лимон кислотата – 2 кыра ньуоска,

— саахар – 350 кыраам,

— оргуйбут уу – 5 лиитэрэ.

Хайдах бэлэмниибит:

Дьаабылакалары кичэйэн сууйабыт, куурда сотобут уонна 2 чаас курдук мууһурбаҕа (морозильник) туруорабыт. Сорохтор 4-5 чаас устата туруораллар диэн истибитим. Таһааран бытархай гына кырбыыбыт, уҥуоҕун ылабыт уонна мясорубкаҕа эрийтэрэбит. Бэлэм маассаҕа 2 лиитэрэ итии ууну кутабыт, ытыгынан булкуйабыт уонна чаас курдук туруорабыт. Сойбутун кэннэ ылан сиидэлиибит. Хойуу маассаҕа убаҕаһа хаалбатын курдук маарыланы хас да хос тутан сиидэлиир ордук. Сиидэлээн баран улахан миискэҕэ кутабыт, үрдүгэр оргуйбут сөрүүн, 5 лиитэрэ ууну эбэбит. Манна лимон кислотатын, саахары кутан булкуйабыт. Иһитттэргэ кутаттаан сөрүүн сиргэ уура сылдьан иһэбит.