Маҕан кылабыыһатыгар байыаннай дьайыы кыттыылаахтарыгар анаммыт мемориальнай комплекс тутуллуоҕа

Социальнай ситимнэринэн байыаннай дьайыы кэмигэр өлбүт байыаннайдар көмүллүбүт Маҕан кылабыыһатын учаастагар грейдер үлэлии турара көстөр видеота тарҕанна.

«Ритуал»  тэрилтэтэ иһитиннэрэринэн, онно мемориальнай эбийиэктэри оҥорууга сөбүлэһиллибит үлэлэр ыытылла тураллар.

«Куорат салалтата байыаннай дьайыы кыттыылаахтарын дьиэ кэргэттэрин кытта ыыппыт көрсүһүүлэрин түмүгүнэн, бу секторы тупсаран оҥорорго уонна байыаннай көмүү статуһун иҥэрэргэ кыттыһан быһаарыы ылыллыбыта. Үлэ бастакы түһүмэҕэр сир үлэлэрэ уонна сири былааннааһын киирэр. Ол кэнниттэн мемориальнай эбийиэктэри — өйдөбүнньүгү уонна кутурҕан сиэрин-туомун толорор сири тутуу үлэлэрэ былааннаналлар», — диэн иһитиннэриигэ этиллэр.

Көмүү сирдэрин кадастровай докумуоннара оҥоһулунна. «Учаастагы тупсаран оҥоруу бырайыагын эскииһэ уонна тутуу докумуоннара байыаннай дьайыы кыттыылаахтарын дьиэ кэргэттэрин кытта сөбүлэһилиннилэр, үлэни толорорго бары наадалаах докумуоннар ылылыннылар», — диэн «Ритуалга» бэлиэтээтилэр.