Маҕаҥҥа байыаннай дьайыы бэтэрээннэрэ Хорсун буолуу уруогун ыыттылар

Маҕан сэлиэнньэтин «Ритм» култууратын дьиэтигэр оскуола үөрэнээччилэрин анал байыаннай дьайыы кыттыылаахтарын – аҕалыы-уоллуу Варламовтары кытта патриотическай көрсүһүүлэр буолан аастылар.

Бу туһунан «Аҕа дойду көмүскээччилэрэ» пуонда Саха сиринээҕи филиалыгар иһитиннэрдилэр. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.

Хорсун буолуу уруогун сүрүн сыалынан Аҕа дойдуну көмүскээһин диэн тугун бэйэлэрин уопуттарыгар билбит дьону кытта тыыннаах кэпсэтии буолар. Бойобуой дьайыылар бэтэрээнэ Станислав Варламов уонна кини уола, Маҕан оскуолатын выпускнига Алексей оҕолорго сулууспа, бойобуой доҕордоһуу уонна Арассыыйа байыаннай сулууспалаахтарын хорсун быһыыларын туһунан кэпсээтилэр.

Тэрийээччилэр бэлиэтииллэринэн, көрсүһүү истиҥ эйгэҕэ ааста. Оскуола үөрэнээччилэрэ байыаннай сулууспалаахтар күннээҕи олохторун, аныгы сэби-сэбиргэли уонна фроҥҥа доҕордоһуу туһунан көхтөөхтүк ыйыталастылар.

Тэрээһин түмүгэр оҕолор бэтэрээннэргэ уруһуйдарын уонна суруктарын туттардылар. «Байыаска кинини күүтэллэрин уонна итэҕэйэллэрин билэртэн ордук күндү туох да суох. Эһиги аккырыыккаларгыт – төрөөбүт дойду салгынын курдук», – диэн Алексей Варламов  бэлиэтээтэ.

Уруок «Аҕа дойду көмүскээччилэрэ» пуонда  социальнай координатора Туйаара Макарова өйөбүлүнэн тэрилиннэ. «Аҕа дойду көмүскээччилэрэ» пуонда  патриотическай көҕүлээһиннэргэ, ол иһигэр «Саллаат аҕата» мэтээллэри туттарыыга көхтөөхтүк кыттар. Бу аахсыйа өрөспүүбүлүкэ үгүс улуустарын, ол иһигэр Дьокуускай куораты, Уус Алдан уонна Томпо улуустарын хапта.