Маҕарастар умайбыт маһы туһаҕа таһаараллар

Былырыын ойуур баһаара Горнай улууһун Маҕарас нэһилиэгин хойуу күөх тыатын күл-көмөр оҥорбута. 

Быйыл маҕарастар хара тумарык буолан турар сири-уоту ыраастыыр инниттэн «Жизнь лесу» диэн  бырайыагы саҕалаатылар. Бу күннэргэ ойуур баһаарыттан ордон хаалбыт, сууллубут мастары оһоххо отторго анаан эрбээн бэлэмнээтилэр. Бэлэмнэммит маһы нэһилиэнньэҕэ буор-босхо түҥэттилэр. Бу күннэргэ 100 кв м иэннээх ойуур турбут сирин ыраастаабыттар. Үс оҕолоох, үлэтэ суох сылдьар Владлен Никаноров маһы эрбээһиҥҥэ үлэлээн, хамнас аахсыбыт.

Маҕарас нэһилиэгин баһылыга Владимир Текеянов: «Ойуур баһаарыттан умайбыт сири-уоту, тыаны чөлүгэр түһэрэр анал бырайыагы саҕалаатыбыт. Бу күннэргэ кыаммат, элбэх оҕолоох ыалларга, биэнсийэлээхтэргэ уонча бырасыап маһы оһоххо оттоллоругар диэн түҥэттибит. Былырыыҥҥы баһаарга бэлэмнээбит саһааннара умайбыттарга эмиэ биэрдибит», — диэн кэпсээтэ.

Маҕарастар маннык тэринэн үлэлээн эрэллэрэр атын улуустарга  үтүө холобур буолуон сөп. Онон бэрт сотору маннык хабааннаах бырайыактары тэрийиэхтэрэ диэн эрэнэбит.