Магнитнай буурҕа: күн устата чуумпу буолуо суоҕа

Share

Бэҕэһээ, ахсынньы 4 күнүгэр, Сиргэ 6 баалга чугаһыыр күүстээх магнитнай буурҕа түспүтэ. Күҥҥэ тахсыбыт улахан эстиилэртэн кэлэр нэдиэлэҕэ күн-дьыл уларыйыытыгар ылларымтыа дьоҥҥо уустук кэмнэр тосхойуохтара.

Оттон бүгүн, ахсынньы 5 күнүгэр, геомагнитнай хамсааһын намыһах буолара күүтүллэр. Ол эрээри, бу күн толору чуумпу буолуо суоҕа — геомагнитнай хамсааһын сабаҕалааһына син биир үрдүк. Ордук тымыр, сүрэх ыарыылаахтар сэрэхтээх буолалларыгар сүбэлэнэр.

Учуонайдар уонна кэтээн көрөөччүлэр иһитиннэрэллэринэн, бүгүҥҥү күҥҥэ күнүс 15:00 чааска диэри геомагнитнай  хамсааһын 4 баал таһымыгар турар. Бу кэмҥэ күн-дьыл уларыйыытыгар ылларымтыа дьон доруобуйата мөлтүүрэ, төбөтө ыалдьара, хаан баттааһына оонньуура, уопсай туруга мөлтүүрэ бэлиэтэниэн сөп. Оттон күнүс 15:00 чаас кэнниттэн геомагнитнай хамсааһыннар сыыйа-баайа намтыахтара, 3-3,5 баалга диэри түһүөхтэр — уопсай турук көнөн барыахтаах.

Бүгүҥҥү күҥҥэ геомагнитнай хамсааһын үрдүгүн таһынан, атмосфернай баттааһын эмиэ үрдүүрэ күүтүллэр. Бу икки куһаҕан дьайыы холбоһон, күн-дьыл уларыйыытыгар ылларымтыа дьон туругар икки бүк дьайыан сөп. Үрдүк хаан  баттааһыннаах уонна тымыр-сүрэх ыарыылаахтарга  ордук уустук буолуо.

Быраастар тугу сүбэлииллэрий?

Магнитнай буурҕа кэмигэр уонна кини кэнниттэн доруобуйаҕытын харыстанар туһугар быраастар маннык сүбэлэри биэрэллэр:

1. Сынньалаҥ: Кыах баарынан элбэхтик сынньаныҥ, эрдэ утуйуҥ. Аһара сылайар, күүстээх ноҕуруускалары оҥорор наадата суох.

2. Ууну иһии: Ыраас ууну, от-мас чэйин элбэхтик иһиҥ. Кофеттан, күүстээх чэйтэн уонна арыгыттан туттунар ордук.

3. Аһылык: Сыалаах-арыылаах, туустаах аһы сиэбэккэ, оҕуруот аһын, фруктаны сии сатааҥ.

4. Салгын: Таһырдьа сылдьан ыраас салгынынан тыынар олус туһалаах, ол эрээри аһара тоҥор сэрэхтээх. Дьиэни, үлэлиир хоһу күннэтэ салгылатыҥ.

5. Эмтэр: Хаан батааһынын хонтуруоллана сылдьыҥ. Быраас анаабыт эмин кэмигэр иһэри умнумаҥ.

6. Уйулҕа өттүнэн турук: Айманымаҥ, кыыһырымаҥ. Нуһараҥ муусуканы истиҥ, сөбүлүүр дьарыккытынан дьарыктаныҥ.

Күн көхтөөх буолуута бу ый устата хаста да бэлиэтэниэҕэ. Онон күн-дьыл уларыйыытыгар ылларымтыа дьон кэлэр күннэргэ доруобуйаларыгар ордук болҕомтолоох буоларгытыгар сүбэлэнэр.

Recent Posts

  • Сонуннар
  • Уопсастыба

2026 сылтан хапытаалынай өрөмүөн иһин төлөбүр үрдүөҕэ

Кэлэр сыл тохсунньу 1 күнүттэн Саха сиригэр элбэх кыбартыыралаах дьиэлэр хапытаалынай өрөмүөннэригэр төлөбүр алын кээмэйэ…

23 минуты ago
  • Сонуннар
  • Уопсастыба

«Үтүө санаа харыйата» уон биирис төгүлүн ыытыллар

Өрөспүүбүлүкэ киин куоратыгар «Үтүө санаа харыйата" аахсыйа саҕаланна. Бу аахсыйаны 2015 сыллаахха Айсен Николаев Дьокуускай…

42 минуты ago
  • Сонуннар
  • Уопсастыба

Роскомнадзор «Roblox» оонньуу үлэтин хааччахтаата

Роскомнадзор быһаарыытынан уонна төрөппүттэр көрдөһүүлэринэн Арассыыйаҕа мөлүйүөнүнэн оҕо сөбүлээн оонньуур онлайн-платформата «Roblox»  үлэтэ хааччахтанна. Роскомнадзор…

52 минуты ago
  • Сонуннар
  • Сүрүн

Харчы сүгүн олордубат, тыына да ыарахан

Эмиэрикэҕэ Махтал күнэ ааста, Трамп олохтуу сатаабыт эйэтин дуогабара олохтоммото. Ол да буоллар ытырбытын ыһыктыбат,…

1 час ago
  • Интэриэһинэй
  • Сонуннар

Нэдиэлэтээҕи гороскоп: Ахсынньы 5 – ахсынньы 12 күннэрэ

Бу нэдиэлэҕэ сулустар тугу сүбэлииллэр?  Хой Уһуну-киэҥи толкуйдуур кэмиҥ кэлбит. Ардыгар наһаа күннээҕинэн олорор курдуккун.…

2 часа ago
  • Сонуннар
  • Сүрүн

Ахсынньы 5 күнэ: тибии, буурҕа түһэр, күнүс -50°С кыраадыс

Бу күннэргэ төһө тымныйарый? Күнү-дьылы кэтээн көрөөччүлэр туох диэтилэр? Өрөспүүбүлүкэ сорох улуустарыгар, соҕуруулуу-илин, Халыма-Индигиир улуустарынан…

3 часа ago