МАХ мессенджер нөҥүө култуура тэрээһиннэригэр билиэттэри атыылаһыахха сөп

Саха сирин олохтоохторо сынньалаҥнарын былаанныырга табыгастаах ньыманан туһанар кыахтаннылар. Билигин киинэҕэ, кэнсиэргэ, испэктээккэ уонна быыстапкаларга Бүтүн Арассыыйа үрдүнэн билиэттэри МАХ национальнай мессенджергэ баар «Госуслуги Культура» мини-сыһыарыы нөҥүө атыылаһыахха сөп.

Сервиһинэн туһанарга мессенджер иһигэр көрдөбүлгэ «культура» диэн тылынан «Госуслуги Культура» мини-сыһыарыытын булуохха наада. Онтон куораты уонна тэрээһини талан, күнүнэн-дьылынан сиидэлээн, эбэтэр «Пушкинскай каартанан» төлүүр кыаҕы бэлиэтээн баран, талбыт тэрилтэҥ саайтыгар киирэн атыылаһыыны түмүктүөххэ сөп. Сервис МАХ мессенджергэ киириитэ «Пушкинскай каарта» бырагырааматыгар кыттар ыччакка саҥа кыахтары арыйар уонна култуура сынньалаҥын былааннааһын бырассыаһын судургутутар.

МАХ — VK хампаанньа Арассыыйа Федерациятын цифровой сайдыы, сибээс уонна маассабай коммуникация министиэристибэтин уонна «Ростех» экосистиэмэтин тэрилтэлэрин өйөбүллэринэн оҥорбут аныгы цифровой платформата. Бары тарҕаммыт тэриллэргэ — iOS, Android, Windows, macOS уонна веб-барылыгар үлэлиир. MAX-ка Арассыыйа эбэтэр Беларусь төлөпүөнүн нүөмэринэн эрэ регистрацияланыахха сөп. Туһанааччы бары дааннайдара Арассыыйа иһигэр баар сервердэргэ, сокуону толору тутуһан хараллаллар. Бүгүн туһанааччылар платформа сүрүн кыахтарынан туһаналлар: суругунан уонна куолаһынан чааттарынан; эрийиинэн; 4 ГБ диэри кээмэйдээх файллары ыытыынан; СБП нөҥүө харчыны көһөрүүнэн; GigaChat олоҕор оҥоһуллубут чат-боттарынан; «Госуслугалары» кытта интеграцияны киллэрэн туран, сорох судаарыстыбаннай сервистэринэн.

«МАХ» национальнай мессенджери олоххо киллэрии – Саха сирин цифровой куттала суох буолуутугар улахан хардыы: Арассыыйа стандартынан дааннайдары шифровкалыыры, госуслуганы кытта интеграцияны уонна үлэ түргэн тэтимин хааччыйар. Ордук сыаналааҕынан «Цифровой ID» сервис буолар, ол нөҥүө динамичнай QR-код көмөтүнэн тус дааннайдары биэрбэккэ эрэ, элбэх оҕолоох дьиэ кэргэнтэн саҕалаан устудьуоҥҥа тиийэ статуһу бигэргэтиэххэ сөп. Бу олохтоохторго өҥөнү ылыыны табыгастаах, көмүскэллээх, бириэмэни кэмчилээн уонна бюрократияны аҕыйатан оҥорор. Биһиги, инновация министиэристибэтэ, омук платформаларыттан тутулуга суох, хас биирдии Саха сирин олохтооҕо информацияны куттала суох уонна түргэнник атастаһарынан туһанарын туһугар кинини киэҥник тарҕатабыт», – диэн Саха Өрөспүүбүлүкэтин Инновацияҕа, цифровой сайдыыга уонна инфокоммуникационнай технологияларга миниистирэ Петр Николаев эттэ.

Санатан эттэххэ, СӨ Ил Дархана Айсен Николаев МАХ цифровой платформаҕа бэйэтин ханаалын ыытар. Официальнай сирэй бу сигэнэн аһыллар. Ону тэҥэ өрөспүүбүлүкэ бырабыыталыстыбата бэйэтин официальнай ханааллаах, ол бу сигэнэн баар.