Махтал — Учууталга

Учуутал — дьоҥҥо-сэргэҕэ киэҥник биллэр, ытыктанар киһи. Учуутал диэн тылга дириҥ өйдөбүл, сырдык санаа, таптал, махтал, ытыктабыл — барыта түмүллэр.
Ханнык баҕарар идэҕэ инники күөҥҥэ сылдьар киһини холобур оҥостоллор.

Ол курдук, 2 Хомустаах орто оскуолатыгар алын сүһүөх кылаас учуутала Феоктистова Дарья Семёновна — учуутал, үөрэнээччи бары тумус туттар, холобур оҥостор киһилэрэ. Оскуолаҕа үлэлиир кэммэр учуутал доҕорум Дарья Семёновна буолбута. Билигин арҕаа эҥээри булан, сибээспитин быспакка, ыкса билсэ, кэпсэтэ олоробут. Олох чугас эдьиийим курдук саныыбын.

Дарья Семёновна 2 Хомустаах орто оскуолатыгар өр кэмҥэ учууталлаан, төһөлөөх элбэх оҕону иитэн-үөрэтэн таһаарбыта буолуой?! Баай уоппуттаах, маастар учуутал буолан, оҕолор чиҥ билиини ылалларын ситиһэрэ. Билигин кини үөрэнээччилэрэ өрөспүүбүлүкэ араас муннуктарыгар ситиһиилээхтик үлэлии-хамныы сылдьаллар. Үөрэппит учууталларын умнубаттар, сибээстэрин быспаттар.
Дарья Семёновналыын наһаа өйдөһөн, тапсан бииргэ үлэлээбиппит. Мин кини кылааһын оҕолоругар үрдүкү кылааска саха тылын уонна литературатын үөрэппитим. Кылаас салайааччыта этим. Кэлин олохтоох түмэлгэ үлэлиир кэмигэр оскуоланы, үөрэппит кылаастарын кытта бииргэ үлэлээбитэ. Кылаас таһынан үлэни, уруоктары түмэлгэ ыытарбыт. Эрдэттэн бэлэмнэнэн, тематическай кылаас чаастарын тиһигин быспакка ыытара. Ону таһынан улуус, өрөспүүбүлүкэ таһымнаах кыраайы үөрэтэр, научнай-бырактыычаскай кэмпириэнсийэлэргэ үөрэнээччилэри кытыннаран, дакылаат ааҕаллара. Ол курдук, Сыроватская Саргы Чурапчы көһүүтүн тиэмэтигэр дакылаата өрөспүүбүлүкэҕэ 2-миэстэни ылбыта, сыаналаах бирииһинэн бэлиэтэммитэ. Ону таһынан нэһилиэк устуоруйатын үөрэтэн, ахтыылары хомуйан, былыргы номохтору суруйан, хаһыакка бэчээттэтэллэрэ. Халдеев Женя «Матаппа«, Беляева Света «Эбэ алааһыгар Миитээ миэлиҥсэтэ» курдук ахтыылара «Кэскил» хаһыакка тахсыбыттара. Нэһилиэккэ олохтоох буойун-учуутал, бэйиэт М.Н.Артемьевка аналлаах «Хомустаахпын таптыыбын» ахтыы киэһэтин үөрэнээччилэрэ Степанова Света уонна Беляева Света ыыппыттара. Олохтоох мелодист, самодеятельнай композитор Г.Г.Слепцов, хомуска үөрэппит үөрэнээччитэ Захарова Люда, сэрии уонна үлэ бэтэрээнэ Гоголев А.Ст., учуутал, үлэ бэтэрээнэ Местников С.А., нэһилиэк сэбиэтин бэрэссэдээтэлэ Тихонов К.Н., оскуола учуутала Колесов И.Д., улахан уола С.М.Артемьев, о.д.а. кыттыыны ылбыттара, олус сэргэх ахтыы оҥорбуттара. Ол олохтоох түмэлгэ көрүүгэ турар.
Дарья Семёновна өр сыллаах айымньылаах үлэтэ үрдүктүк сыаналаммыта. Арассыыйа үөрэҕириитин туйгуна, «За верность профессиональной деятельности», «Албан аат » бэлиэлэрдээх, 2 Хомустаах Ытык киһитэ, дьон барыта ытыктыыр, үрдүктүк сыаналыыр учуутала. Киниэхэ киһи холобур оҥостор үгүс үтүө хаачыстыбалара баар буоланнар, Дарья Семёновнаны үөрэппит оҕолоро, биир идэлээхтэрэ, төрөппүттэр истиҥ иһирэх тылынан ахталлар, дириҥник убаастыыллар, махтаналлар.

Екатерина Афанасьевна АБРАМОВА, СӨ үөрэҕириитин бочуоттаах бэтэрээнэ, 2 Хомустаах бочуоттаах олохтооҕо.