Суотту ытык бэлиэ сирдэринэн айан

Кыырай эрэ,
Кыталык буолан,
Кырдалы,сыһыыны үрдүнэн
Кыайыы ырыата!

С.С.Васильев-Борогонскай

Улуу Кыайыыны үйэтитиигэ аналлаах нэһилиэк ытык сирдэринэн айаннар, бэлиэтээһиннэр, сүүрүү, автопробег үрдүк тэрээһиннээхтик ыытылынна.

Арассыыйаҕа Аҕа дойдуну, Саха сиригэр Ийэ дойдуну көмүскээччи сылларынан, Улуу Кыайыы өрөгөйдөөх 80 сылынан Хоноҕордооҕу «Түһүлгэ» СК бырайыагынан (сал.Гоголева Е.Н.) киэн туттар биир дойдулаахпыт С.С. Васильев-Борогонскай аатын уонна Улуу Кыайыыны үйэтитиигэ аналлаах тэрээһиннэр тиһиктээхтик салҕаналлар.

Бырагыраама быһыытынан Кыһыл Кырдал ытык сиригэр Хоноҕор сүрүн оскуолатын иннигэр турар өйдөбүнньүккэ мустан талааннаах бэйиэт, уһулуччулаах уопсастыбаннай диэйэтэл, П.А. Ойуунускай аатынан Судаарыстыбаннай бириэмийэ лауреата С.С.Васильев-Борогонскай сырдык аатыгар аналлаах үөрүүлээх тэрээһин буолла. Ол курдук, «Улуу Кыайыыны уһансыбыт бэйиэт» иһитиннэрии болҕомтону тарта. Суотту орто оскуолатын 2 кылааһын үөрэнээччилэрэ (сал. Свинобоева Е.И.) хоһоон, ырыа, үҥкүү толордулар, эҕэрдэ тыллар этилиннилэр. Ол кэнниттэн нэһилиэк Дьоруой Ийэлэрин искибиэрдэригэр, С.С. Васильевка-Борогонскайга аналлаах искибиэргэ, «Уус Алдан улууһа» стелаҕа, «Сулус» пааматынньыкка уонна поэт төрөөбүт алааһыгар кэрэ айылҕалаах Бөрө Бастаахха тиийэн, бэлиэ сирдэргэ тохтоон, сибэкки дьөрбөлөрүн ууран, поэт «Эриэккэс да дойдулаах эбиккин», «Барыта оҕолор иһин» үйэлээх хоһооннорун күргүөмүнэн ааҕан, история чахчыларын кэпсээн, үйэтитэр суолталаах айаҥҥа сылдьан кэллибит.

Маны тэҥэ бу киэһэ Кыһыл Кырдалга «Мин мантан сэриигэ барбытым» өйдөбүнньүккэ «Өйдөбүнньүк чүмэчи» Бүтүн Арассыыйатааҕы патриотическай аахсыйаҕа кытынныбыт.

Долгуйа кэтэһиилээх тэрээһиҥҥэ көхтөөх кыттыыны ылбыт үүнэр көлүөнэ ыччаппытыгар — оскуола үөрэнээччилэригэр, учууталларыгар, Уус Алданнааҕы техникум устудьуоннарыгар, уһуйааччыларыгар, «Доҕордоһуу» түмэл кэлэктиибигэр, нэһилиэкпит олохтоохторугар барҕа махталбытын тиэрдэбит.

Киэн туттуоҕуҥ, айхаллыаҕыҥ Аҕа көлүөнэ ытык дьоммутун!

Ирина Осипова,

Суотту, Уус Алдан.

Зоя Иванова, Вилена Стрекаловская, Марианна Бурцева, Анна Добрецова хаартыскаҕа түһэриилэрэ