Майа аттыгар тыатааҕыны бултаатылар

Балаҕан ыйын 23 күнүгэр Майа сэлиэнньэтин аттыгар тыатааҕыны бултаабыттар диэн сурах тарҕанна. Бу төһө оруннааҕый? Мэҥэ Хаҥалас улууһун экологическай хонтуруолга судаарыстыбаннай инспекциятын салайааччы Федор Охлопковка эрийэн, билистибит.

— Майа сэлиэнньэтигэр киирэр сурук аттыгар Сыгынньах диэн алаас баар. Онно 3-4 саастаах эдэр эһэ урут өлбүт борооску сэмнэҕин булан, уҥуоҕун кирэ, сии сылдьарын туһунан иһитиннэрии киирбитэ. Бу эдэр эһэ ийэтиттэн үүрүллүбүт буолан, бэйдиэ сылдьар кэриҥнээх. Ол алаастан сыбаалка диэки барбыт, онтон төннөн кэлбит этэ. Нэһилиэнньэлээх пуунтан араҕар санаата суох. Бу суол аттынан хаалыктаах хаамааччылар, сатыы дьон, сүүрүктэр да элбэхтик сылдьаллар.

Онон нэһилиэнньэҕэ кутталлаах диэн, өлөрөргө быһаарыныы ылбыппыт. Лицензия баар. Булчуттар Александр Тастыгин, Павел Саввин 4-5 киһилээх хамаанда тэринэ охсон, бултуу барбыттара. Бэҕэһээ киэһэ бултаабыттар этэ, — диэн кэпсээтэ.