Майа баһылыга улахан уйуктаах массыына суоппардарыгар тирэҕирэр

Мэҥэ Хаҥалас улууһугар быйылгы сайыҥҥа кураан күннэри баттаһа үгүс үлэ ыытыллар.

Маныаха Майа сэлиэнньэтин баһылыга Алексей Неустроев субуотунньугунан улахан уйуктаах массыыналаах дьонун кытта уопсай тылы булан үлэлэһэр.

— Ыарахан кыамталаах  массыына суоппардара уонна  тырахтарыыстара биир санаанан салайтаран, Майабыт сайдарын туһугар сүҥкэн кылааттарын киллэрэ сылдьаллар.  Дьэ,  туруу үлэһит уолаттар. Икки сыл иһигэр кинилэр көмөлөрүнэн Майабытыгар барыта 17 уулусса оҥоһулунна, 1000 куб таас тиэллэн тэлгэннэ. «Таптал көлүччэтэ» саҥалыы тупсарыллан оҥоһулларыгар сирин-уотун бэлэмнээһиҥҥэ 1000 куб кумаҕы тастылар.  Маны таһынан, кинилэр көмөлөрүнэн, улууспут биир саамай улахан бөх тоҕор сыбаалката сааһыланна , — диэн бэлиэтиир Майа сэлиэнньэтин баһылыга Алексей Неустроев.

Бу күннэргэ баһылык үлэһит суоппардарын мунньан, анаан махтанна. Өрүттэр төрөөбүт дойдуларын сайдарын туһугар үлэлии сылдьар дьон быһыытынан,  сылаас чэй иһэ-иһэ истиҥник кэпсэттилэр, салгыы үлэлэһэр былааннары торумнаатылар.

Билигин да кылгас сайыны баттаһа үлэ үгүс.  Онон салгыы тапталлаах Майалара чэчирии сайдарын туһугар,  эр дьон маннык тутуспутунан бииргэ түмсүүлээхтик үлэлээтэхтэринэ, туох барыта кыайтарара, ыарахан да чэпчиирэ, ыраах чугаһыыра  да чахчы.