Майа бэстибээлэ эр дьон Оһуокайынан саҕаланна

Мэҥэ Хаҥалас улууһа урукку сэбиэскэй кэмтэн нэһилиэктэринэн культура уонна спорт бэстибээлин ыытар үтүө үгэстээх.

Майа сэлиэнньэтин дьаһалтатын көҕүлээһининэн тэрилтэлэр икки ардыларыгар «Бары бииргэ түмсэммит — ил-эйэни түстүөҕүҥ»  девизтээх В.К.Степанов аатынан культура уонна спорт эстэпиэтэ-бэстибээлэ ыытыллар.  Иккис сылын күрэҕи Оһуокайынан саҕалыыр үгэстэнэн, тэрээһин  бүгүн, олунньу 15 күнүгэр, ыытылынна. Сүрүн тэрийээччи Майа сэлиэнньэтин дьаһалтата. Баһылык Алексей Иннокентьевич Неустроев уонна Д.Ф.Ходулов аатынан Майатааҕы норуот айымньытын киинин үлэһиттэрин ыҥырыыларынан республикатааҕы «Оһуокай» уопсастыбатын түмсүүтэ эр дьон Оһуокайга күрэҕэр дьүүллүүр сүбэҕэ үлэлээн киирдибит. Түмсүүбүт салайааччыта А.Д.Данилов-Дьулуур Хаан, солбуйааччыта А.В.Тарскай уонна Дархан этээччилэр Марта Николаева, Валентин Хорунов, үтүөлээх этээччилэр Петр Григорьев, Данил Пестряков, кынат Айыы Уолана Алаас буолан үлэлэһэн киирдибит.
Баһылык Алексей Иннокентьевич Майа сэлиэнньэтигэр  аҕыс тыһыынчаттан тахса киһи олорорун, быйыл сэлиэнньэ иһигэр Удьуор утумун сыла биллэриллибитин кэпсээтэ.

Эстэпиэтэ биир ый устата барар эбит. Бастакы күрэх эр дьонтон саҕаланна.Оһуокай күрэҕэр түһүлгэҕэ 25 киһиттэн итэҕэһэ суох эр дьон кыттара ирдэнэр эбит. Бөлөх аайы 40-гар уонна 40-тан үөһээ саастаах эр дьон кыттара ирдэнэр. Баһылык Оһуокайга эр дьону тоҕо өрө туһулаан кытыннарабытый диэн ыйытыыга, ыччаты олохсутуу, аҕа оруолун үрдэтии, ыал буолан олохсуйан олороллорун ситиһии сыалыттан тэриллэрин быһаарда. Холобур, күрэххэ этээччи матыыба көҥүл, ис хоһоонугар Сомоҕолоһуу уонна культура сылларын хоһуйара ирдэнэр. Тэрилтэ аатыттан икки эр киһи түһүлгэни таһаарар, этэр бириэмэтэ 15 мүнүүтэттэн итэҕэһэ суох. Улуустааҕы киин балыыһа тэрилтэтин түһүлгэтигэр этээччилиин отут киһи кытынна. Бары ис хоһооннорун арыйдылар уонна мэлдьи этэ сылдьар этээччиттэн сорох сорохторо итэҕэһэ суохтар дии санаатым. Уон киһи эппититтэн биэс киһи дипломан, биэс киһи лауреат аатын ыллылар. Бары сахалыы таҥнан кэлбиттэрэ көрөргө олус астык. Аны сайын Үс Хатыҥ оһуокайын түһүлгэтин күрэҕэр бары кытта киирэллэригэр ыҥырдыбыт. Тэрилтэлэринэн оһуокай күрэҕэр киин балыыһа — бастакы, «Кэнчээри» оҕо уһуйаана — иккис, И.Г.Тимофеев аатынан лицей — үһүс, Ф.Г.Охлопков аатынан оскуола — төрдүс, В.П.Ларионов аатынан оскуола — бэһис буоллулар. Этээччилэртэн лауреат аатын И.Игнатьев, Масаха Мэхээлэ, Ю.Беляев, З.Моякунов, С.Марков ыллылар.

Инникитин Майа сэлиэнньэтин эстэпиэтэтин эр дьон Оһуокайын күрэҕин биһирээн туран, атын улуустарга тарҕатан, оһуокай хамсааһынын күүһүрдүөххэ диэн, түмсүүбүт салайааччыта Александр Джурович эттэ.
Майа сэлиэнньэтин баһылыга А.И.Неустроев оттомноох тылын-өһүн истэн олус астынныбыт. Алексей Иннокентьевич ийэтэ Л.И.Неустроева биһиги түмсүүбүт үтүөлээх этээччитэ, оттон аҕата Иннокентий Неустроев республикаҕа киэҥник биллэр суруналыыс этэ.
Түмүктээн эттэххэ, Майаҕа эркин курдук эрэнэр, ыал аҕа баһылыктара, кэскиллэрэ мустан оһуокайдаабыттара бары улуустарга холобур буолуон сөп.
Бу күрэххэ тэрилтэ охранниктара, кочегардар, электрик, учуутал, депутат, общественник эттилэр.

Марта Николаева