Майа оскуолатыгар саҥа киин аһылынна

Бэҕэһээ, сэтинньи 18 күнүгэр, В.П. Ларионов аатынан Майа орто оскуолатыгар национальнай бырайыак чэрчитинэн, «БАС» (ыраахтан салайыллар көтөр тиһиктэр) киин аһылынна.

— Күн бүгүн улууспутугар үөрэхтээһин эйгэтигэр ыччаттарбыт сайдыылаах үйэни кытта тэҥҥэ хардыылыылларыгар араас хайысхалаах бырайыактар үлэлииллэр. Маннык тирэх киин аһыллыбыта улууспутугар үөрэх эйгэтигэр биир суолталаах хардыы буолар.

Инникитин ыраахтан салайыллар көтөр тиһиктэри ыччаттарбыт норуот хаһаайыстыбатын бары салааларыгар туһаналларыгар, тутталларыгар үөрэтии киин үлэтин сүрүн соругунан буолар.

Үөрэнээччилэргэ үөрэххитигэр ситиһиилэри, саҥа идэлэри баһылаан, төрөөбүт дойдубут сайдыытыгар айар-тутар, дьоһун дьон буолан тахсыҥ диэн алгыс тылбын аныыбын, — диэн Мэҥэ Хаҥалас улууһун баһылыга Дмитрий Тихонов.