Майаҕа Билии күнүн бэлиэтээтилэр

Бүгүн саҥа үөрэх дьылыгар Мэҥэ Хаҥалас улууһун Майа сэлиэнньэтигэр 126 оҕо оскуола боруогун аан бастаан атыллаата. 

Ол курдук, олохтоох дьаһалта пресс-сулууспата иһитиннэрбитинэн, В.П. Ларионов аатынан Майатааҕы орто оскуолаҕа 69  оҕо, Ф.Г. Охлопков аатынан Майатааҕы орто оскуолаҕа 57 кырачаан үөрэнээччи үөрэх-билии кыһаларыгар үөрэнэ киирдилэр.  И.Г. Тимофеев аатынан Майатааҕы лицейгэ 5-с кылааска 24 оҕо, саҥа арыллыбыт 7-с инженернэй кылааска 20 оҕо үөрэниэҕэ.

Үөрэх-билии күнүн бэлиэтээн,  ырыаҕа ылланар Майаҕа  үгэс быһыытынан оскуолаларга бырааһынньыктааҕы линиэйкэлэр, кылаас чаастара, Ийэ дойдуга бэриниилээх буолууга туһаайыллыбыт уруоктар оскуола оҕолорун түмтүлэр.

Бүгүн учууталлар үөрэнээччилэригэр бастакы чиэппэрдээҕи соруктары билиһиннэрдилэр. Онон сарсыҥҥыттан дьаныардаах үөрэх түбүктээх күннэрэ саҕаланаллар.