Майаҕа эр дьон түмсүүтүн мунньаҕа буолла

Бэҕэһээ, алтынньы 25 күнүгэр, Мэҥэ Хаҥалас улууһун Майа сэлиэнньэтигэр Д.Ф. Ходулов аатынан Култуура киинигэр эр дьон түмсүүтүн бастакы тэрээһиннээх мунньаҕа буолан ааста. 

Суолталаах тэрээһин туһунан оройуоннааҕы Ытык сүбэ уопсастыбаннай тэрилтэ салайааччыта Зиновий Игнатьев бэйэтин санаатын бу курдук үллэһиннэ:

— Улуус муниципалитетын баһылыга Дмитрий Тихонов хайа күн талыллыаҕыттан эр киһини өрө тутуу боппуруоһугар утумнаахтык үлэлэһэр. Онон бу тэрээһин мунньах эмиэ кини тус көҕүлээһининэн буолла. Улуус бары нэһилиэктэриттэн 300-тэн тахса киһи кэлэн, култуура киинигэр дьон баппакка, истиэнэ кытыытыгар олох мас булан  олордулар. Тэрээһиҥҥэ ытык кырдьаҕастартан саҕалаан, оскуола оҕолоругар тиийэ элбэх киһи мустан, бэйэлэрин санааларын атастылар.  Сүрүн этинии  уол оҕону иитии боппуруоһун тула буолла. Ол курдук, уолаттары муҥха, куйуур, булт, сүөһүнү астааһын, илиинэн үлэ сатабылларыгар, чөл олоххо уһуйуу, оҕону иитиигэ үөрэх эйгэтигэр эр дьон, аҕа оруолун туһунан үгүстүк эттилэр. Ону тэҥэ, интэриниэт, суотабай төлөпүөн, көмпүүтэр оонньуутун  үйэтигэр оҕону кытта элбэхтик алтыһыы, спордунан дьарыктыыр наадатын бэлиэтээтилэр.

Үгүспүт ордук академик Владимир Ларионов аатынан 1-кы оскуола 10 кылааһын үөрэнээччитэ Петр Корякин этиитин ылына иһиттибит. Кини «Аҕалар, эһиги матасыыкылгытын, массыынаҕытын тоҕо уолаттаргытын кытта бэйэҕит өрөмүөннээбэккэ, автосервискэ туттараҕытый?», — диэн көнөтүнэн ыйытта. Балыктаах нэһилиэгин баһылыга Александр Куприянов: «Киһини кистииргэ, ийэ буорун булларыыга сиэри-туому олох билбэт эбиппит, онуоха үөрэтии, сүбэ-такайыы наада эбит», —диэн санаатын үллэһиннэ. Мин «Булка-аска, муҥхаҕа аҕата суох оҕолору чугаһатыаҕыҥ» диэн эттим. Эдэр аҕалар  «оскуола дириэктэрдэринэн эр дьон буолаллара наада. Оҕолорбут оскуола саастарыттан дьахтар-учууталга, иитээччигэ иитиллэн тахсаллар» диэн санааларын эттилэр. 

Мунньах түмүгэр эр дьон түмсүүтүн Аҕа сүбэ дьонун талыы буолла.  «Уопсастыбанньыгы хамнастаан, анал массыыналаан олордуохха», — диэн этии киирбитин дьүүллэһэн баран, эр дьон түмсүүтүн бэрэссэдээтэлинэн улууспут баһылыгын Дмитрий  Тихоновы бэйэтин таллыбыт. «Хамнас, массыына тутарга  эмиэ үп бараныыһы, баһылык син биир бэйэтэ көҕүлээн тэрийэ сылдьар тэрээһинин салгыы тэниттин, бары көмөлөһүөхпүт, өйүөхпүт» диэн санааҕа кэллибит.  Кини солбуйааччытынан Майа сэлиэнньэтин баһылыга Алексей Неустроев талылынна.

… Ити курдук, Мэҥэ Хаҥалас улууһугар эр дьон хамсааһыннара уопсастыбаннай олоххо эр дьону көхтөөхтүк  тардыыга туһаайылынна.