Майаҕа «Үнүгэс» саҥа лаборатория үлэҕэ киирдэ

Бүгүн, ахсынньы 21 күнүгэр, Мэҥэ Хаҥалас улууһун Майа сэлиэнньэтигэр В.П.Ларионов аатынан орто оскуола баазатыгар  олохтоох көҕүлээһини өйүүр бырагыраама чэрчитинэн  «Үнүгэс» агро-эйгэ лабораториятын үөрүүлээхтик арыйдылар.

Кыһыл лиэнтэни улуус баһылыга Дмитрий Тихонов, улуустааҕы үөрэҕирии  управлениетын салайааччытын солбуйааччы Андрей Захаров,  В.П.Ларионов аатынан орто оскуола дириэктэрин э.т. Гаврил Толстяков быстылар.

904 үөрэнээччилээх, 137 үлэһиттээх орто оскуола өрөспүүбүлүкэҕэ биир бастыҥ үлэлээҕинэн биллэр. Агро-политехническай дьоҕус биисинэс хайысхатынан үлэлиир орто оскуола быйылгы үөрэх дьылыттан үрдүкү кылаас оҕолорун оробуочай идэлэргэ үөрэтиигэ ылыста.

Саҥа лабораторияны үлэҕэ киллэрэр туһунан оскуола дириэктэринэн үлэлии сылдьыбыт Светлана Игнатьева Майа сэлиэнньэтин баһылыгар этии киллэрэн, туруорсан, бырайыагы оннуттан хамсаппыт киһинэн буолар. Онно Майа дьаһалтатын салалтата,  билигин улуус баһылыга Дмитрий Тихонов улаханнык өйөөн, бу лаборатория олоххо киирдэ.

Улуус салалтата бүгүн аһыллыбыт лаборатория үлэтин кытта билистэ. Манна оскуола үөрэнээччилэрэ тыа хаһаайыстыбатын салаатыгар чинчийэр, уопуттары оҥорор үлэни ыытыахтара, оранжерея уонна дьоҕус оҥорон таһаарар производство салаата үлэлиэҕэ.  Онон тыа хаһаайыстыбатын араас салаатын хайысхаларыгар анал идэҕэ оскуола ыскаамыйатыттан уһуйуллан тахсар оҕолорго бу саҥа аһыллыбыт лаборатория улахан өйөбүлүнэн буолара саарбаҕа суох.