Майаҕа сарсыардааҥҥы сэргэх сэрээккэ

Бүгүн, от ыйын 2 күнүгэр, Мэҥэ Хаҥалас улууһун Майа сэлиэнньэтин олохтоохторо үүммүт саҥа күнү сибиэһэй салгыҥҥа сэрээккэттэн саҕалаатылар.

Ол курдук, «Сила России» бүтүн Арассыыйатааҕы марафон уонна Ыччат күнүн чэрчитинэн улуустааҕы успуорт, физкультурнай хамсааһын уонна Социальнай бэлиитикэ салалталара Комсомуол болуоссатыгар сарсыардааҥҥы эрчиллиини тэрийдилэр диэн Мэҥэ Хаҥалас дьаһалтатын пресс-сулууспата иһитиннэрэр.
Сэрээккэни «Парус» успуорт уораҕайын тириэньэрэ Аграфена Яковлева бэрт сэргэхтик, тэтимнээхтик иилээн-саҕалаан ыытта. Эдэриттэн эмэнигэр тиийэ уопсайа 60-тан тахса киһи кэлэн көхтөөх кыттыыны ылла. Мустубут дьон-сэргэ уунууну тургутар күрэстэргэ кытыннылар, «Орел и решка», «Белки-орешки» курдук оонньууларга дуоһуйа оонньоотулар.

Кыайыылаахтар «Парус» успуорт уораҕайыгар киирэн дьарыктаналларыгар, чэбдигирэллэригэр абонемент бирииһинэн наҕараадаланнылар. Оттон сэрээккэҕэ кэлбит дьоҥҥо барыларыгар туоһу сурук туттарылынна.