Майалар Тааттаҕа субуотунньуктаан кэллилэр

Бу күннэргэ Таатта улууһун Ытык Көлүгэр Манчаары оонньууларыгар бэлэмнэнэн, араас хайысхалаах үлэ көхтөөхтүк ыытылла турар.

Иллэрээ күн Мэҥэ Хаҥалас улууһун Майа сэлиэнньэтин  баһылыга Алексей Неустроев салайааччылаах биригээдэ Ытык Күөлгэ субуотунньуктаан кэллэ. Бу туһунан салайааччы маннык сырдатта:

— Ытык Күөл баһылыгар Егор Павловка  туох кыалларынан, туох үлэ баарынан көмө буолан суббуотунньуктуурга этии киллэрбитим. Дьаһалтам үлэһиттэрин мунньан, уонча эр дьон айаҥҥа туруммуппут. Тиийиибитигэр  Егор Иннокентьевич үлэлиэхтээх сирбитин эрдэттэн аттаран туруорбут буолан, күүстээх үлэ көрүстэ. Биһиги тиийиибитигэр Чурапчы улууһун нэһилиэктэрин баһылыктара бааллара. Онон таатталары кытта бары түмсэн бииргэ субуотунньуктаатыбыт. 

Ол курдук, тырыбынаттан сыана олус ыраах турарын, хамыыһыйа көрөөччүлэргэ чугаһатарга сорудахтаабыт. Онон биир улахан үлэни бары көмөлөөн оҥордубут. Ытык Күөлгэ түөлбэ аайы тупсарыныы үлэтэ күөстүү оргуйарын көрө-көрө киһи санаалыын көнньүөрэр. Таатталар Манчаары оонньуутун үрдүк таһымҥа ыытарга бэлэмнэнэллэрин көрө-көрө кинилэргэ эрэ сэлээннээбэккэ, ким туох кыалларынан көмөлөһөрө, өйүүрэ наада. Бу өрөспүүбүлүкэбит барытын бырааһынньыга. Ити курдук, бары түмсүүлээх буоллахпытына кыаллыбаты да кыайыахпыт.