Майатааҕы дьахтар сэбиэтэ элбэх оҕолоох ыалга үөрэх тээбириннэрин бэлэхтээтэ

Бу күннэргэ өрөспүүбүлүкэ улуустарын олохтоохторо быйылгы үөрэх дьылын көрсө элбэх оҕолоох ыалларга оскуола тээбириннэрин бэлэхтиир аахсыйалары тэрийэллэр. 

Саҥа үөрэх дьылын көрсө Мэҥэ Хаҥалас улууһун Майа дьахталларын сэбиэтэ үгэс быһыытынан бэлэх арааһын туппутунан 5 оҕолоох Макаровтарга сылдьан, кырачаан Алешаҕа 2-с кылааска, Дианаҕа, Сайаанаҕа — 4 кылааска киирэллэринэн үөрэх тээбириннэрин  бэлэх ууннулар. Көмөҕө спонсор быһыытынан «Майа фирма» уонна «Глянец» маҕаһыыннар кыттыстылар. Дьахтар сэбиэтин салайааччыта Екатерина Романова уонна Жанна Тумусова оҕолору көрсөн эҕэрдэлээтилэр, үөрэхтэригэр ситиһиилэри баҕардылар.