Майатааҕы норуот тыйаатыра Манньыаттаах уолун туһунан испэктээги туруорар

Дмитрий Ходулов аатынан Майатааҕы норуот  тыйаатырыттан үтүө сонуну иһиттибит. Ол курдук, бу тыйаатыр биир дойдулаахтара Гавриил Васильевич Никифоров-Манньыаттаах уолун туһунан испэктээк туруоран, көрөөччүлэргэ бэлэх уунаары үлэ үөһүгэр сылдьар.

Соһуччу үөрүүлээх сонуну үллэстээри СӨ култууратын туйгуна,  Дмитрий Ходулов аатынан тыйаатыр режиссера, үгүс саха киинэлэригэр, сэрийээллэригэр сөбүлээн көрөр артыыспыт Данил Осиповы кытары сэһэргэстибит.

Данил ОСИПОВ:

— «Эргиллиэм хайаан да…» -– Баһылай Харысхал суруйбут дыраамата. Саха тыйатыырын бу улахан  испэктээгэр хайыы үйэ иккис састаап үлэлии сылдьар, үгүс киһи көрдө, элбэх артыыс оонньоото.
Биһиги Саха тыйаатыра туруорбут испэктээгин хатылаабаппыт, атын буолуоҕа. Николай Степанов суруйбут «Сын Монетного» диэн кинигэтигэр олоҕуран, ону тылбаастаан туруоран эрэбит. Тылбааһын уонна сценарийын Иннокентий Сосин аатынан Майатааҕы бибилэтиэкэ үлэһитэ Надежда Сидорова оҥордо.
Биир дойдулаахпыт, мин үөлээннээҕим Масаха Мэхээс Майатааҕы кыраайы үөрэтэр мусуойга дириэктэринэн үлэлии сылдьан,  Гавриил Васильевич Никифоров-Манньыаттаах уолун пуондатын арыйбыта. Ол пуондатынан кини Лоомтукаҕа Аһыкай алааска баар Манньыаттаах уолун балаҕанын саҥардыан баҕарар. Быйыл сайын  көрөн олус интэриэһиргээбитим. Онно бырайыак суруйарыгар үп-харчы ирдэнэр. Онон уолбутун өйөөн, Дмитрий Ходулов аатынан норуот тыйаатыра бу испэктээги туруорарга санаммыппыт, бу күһүҥҥэттэн үлэлээн саҕалаабыппыт.

Сүрүн дьоруойга оонньуохтаах артыыһы өр көрдөөн-көрдөөн, Ньургун Бэчигэни кытары кэпсэппиппит. Кини бырайыагы сэҥээрэн, тута сөбүлэһэн, билигин күүс-көмө буолан үлэлэһэ сылдьар.
Испэктээккэ Масаха Мэхээс бэйэтэ эмиэ  оонньуур. Ону таһынан  Д.Ходулов аатынан норуодунай тыйаатыр артыыһа, сахалыы киинэлэргэ, сэрийээллэргэ оонньуур  артыыс Спиридон Григорьев, өрөспүүбүлүкэҕэ ыытыллар оһуохай түһүлгэлэрин  көхтөөх кыттааччылара, икки Дархан этээччи: Станислав Иванов уонна Манньыаттаах уолун аймаҕа Виталий Никифоров оонньууллар. Уопсайыанан, Майа, Хорообут, Лоомтука, Ходоро нэһилиэгэ холбоһоннор, улахан испэктээги таһаараары үлэлии-хамсыы сылдьабыт.
Испэктээкпитин ахсынньы 6 күнүгэр Майаҕа, ахсынньы 8 күнүгэр Былатыан Ойуунускай аатынан Саха тыйаатырыгар туруоруохпут, -– диэн Саха тыйаатырын дириэктэрэ Петр Макаровка биир күнү буор-босхо туран биэрэллэригэр улахан махталын этэр.
Саха тыйаатырыгар көрдөрүллүбүт испэктээктэн киирбит үп Манньыаттаах уолун пуондатыгар бэриллиэхтээх.
Саха тыйаатырын аатырбыт-сураҕырбыт артыыһа, ССРС норуодунай артыыһа   Дмитрий Ходулов аатын сүгэр Майатааҕы норуот тыйаатырыгар ситиһиилэри баҕарабыт.